سەمەيدە قۇنانباي وسكەنباي ۇلىنا ارنالعان كورمە اشىلدى

None
None
سەمەي. قازاقپارات - شىعىس قازاقستان وبلىسىنىڭ سەمەي قالاسىندا ابايدىڭ «جيدەباي- ءبورىلى» مەملەكەتتىك قورىق- مۋزەيىندە «كورەگەندى كوسەم، پاراساتتى شەشەن، ەل قامقورى - قۇنانباي» اتتى كورمە اشىلدى، دەپ حابارلايدى قازاقپارات.

كورمەنىڭ ۇيىمداستىرىلۋىنداعى نەگىزگى ماقسات - ءدۇيىم جۇرتقا ابايدىڭ اكەسى قۇنانباي قاجىنىڭ ءومىرى جايلى تەرەڭىرەك تانىستىرۋ.

قۇنانباي وسكەنباي ۇلى بي، اعا- سۇلتان جانە كورنەكتى قوعام قايراتكەرى بولعان. ونىڭ اكەسى وسكەنباي ىرعىزباي ۇلى توبىقتى رۋىن بيلەگەن بەدەلدى كىسى ەدى. قۇنانباي اۋەل باستا اياداي اۋىلداعى ەلدى باسقارىپ، كەيىننەن دارەجەسى ارتىپ، اعا- سۇلتان اتانعان. بۇگىنگى كورمەگە قويىلعان تاريحي جادىگەرلەر ونىڭ ءومىر جولى تۋرالى سىر شەرتەدى. مۋزەيگە كەلۋشىلەر نازارىنا قاجىنىڭ جەكە زاتتارى، كۇمىس بەلبەۋى مەن تاقياسى قويىلعان. ەكسپوناتتاردىڭ جالپى سانى - 70-كە جۋىق.

«ابايدىڭ 175 جىلدىعىنا وراي اقىننىڭ اكەسى قۇنانباي وسكەنباي ۇلىنا ارنالعان كورمە اشتىق. مۇندا سول كەزەڭنىڭ تىنىس- تىرشىلىگىن بەينەلەيتىن كوپتەگەن ەكسپوناتتار ۇسىنىلعان. بۇدان بولەك، قاجى جايلى جازىلعان كىتاپتار مەن مۇراعاتتىق باسىلىمدارداعى ءتۇرلى ماقالالار قويىلدى. بۇل كورمە حالىققا حاكىمنىڭ اكەسى تۋرالى كوپ ماعلۇمات الۋعا مۇمكىندىك بەرەدى»، - دەيدى مۋزەيدىڭ جەتەكشى عىلىمي قىزمەتكەرى نۇرسۇلۋ ساناقبەك قىزى.

كورمەنىڭ سالتاناتتى اشىلۋى بارىسىندا اكادەميك ەرلان سىدىقوۆتىڭ «قۇنانباي» اتتى كىتابىنىڭ تۇساۋكەسەرى ءوتتى.

«بۇگىندە شاھاردىڭ بارلىق وقۋ ورىندارىندا قۇنانبايدىڭ ءومىرى تۋرالى باياندايتىن بۇل كىتاپتىڭ تانىستىرىلىمى ءوتىپ جاتىر. وسكەلەڭ ۇرپاق ءۇشىن سول كەزەڭنىڭ تاريحىمەن تانىسۋ وتە پايدالى بولماق»، - دەيدى اباي اتىنداعى مۋزەي ديرەكتورىنىڭ قوعاممەن بايلانىس جونىندەگى ورىنباسارى تۇردىكۇل قاسەن ۇلى.

اۆتور: تالعاتجان مۇحامەتبەك ۇلى

سوڭعى جاڭالىقتار