قاي ەلدەردەن كەلگەن قازاقستاندىقتار كارانتينگە جاتقىزىلادى

نۇر- سۇلتان. قازاقپارات – ق ر باس مەملەكەتتىك سانيتار دارىگەرى جانداربەك بەكشين كوروناۆيرۋس بويىنشا اسا قاۋىپتى مەملەكەتتەر ءتىزىمىن جاريالادى، دەپ حابارلايدى قازاقپارات ءتىلشىسى.

بۇل تىزىمدەگى مەملەكەتتەردەن كەلگەن قازاقستاندىقتار ءۇي كارانتينىنە وقشاۋلانادى.

«قاۋپى جاعىنان ءبىرىنشى ساناتقا قىتاي، وڭتۇستىك كورەيا، جاپونيا، يتاليا، يران، گونكونگ، ماكاو، تايۆان ەنىپ وتىر. ەكىنشى ساناتتا ءۇش مەملەكەت بار - سينگاپۋر، تايلاند، مالايزيا. ءۇشىنشى ساناتقا - ۆەتنام، گەرمانيا، اۋستراليا، ا ق ش، بىرىككەن اراب امىرلىكتەرى، كانادا، ۇلى بريتانيا مەن فرانسيا ەنگىزىلدى» ، - دەدى باس سانيتار ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

ءبىرىنشى ساناتتاعى ەلدەردەن كەلگەن ازاماتتار 1 - ناۋرىزدان باستاپ ۇيدە كارانتينگە وقشاۋلانادى. كۇندەلىكتى جەرگىلىكتى دارىگەرلەر وسى ازاماتتاردى قاراپ شىعىپ، ناقتى تاپسىرما بەرەتىن بولادى.

«بۇل ولاردىڭ اۋرۋ ەكەنىن بىلدىرمەيدى. ءبىز الدىن الۋ شارالارىن جاساپ جاتىرمىز. ازاماتتار وزدەرى ەلگە كەلگەن سوڭ وقشاۋلانۋى ءتيىس. ولارعا جاقسى جەلدەنەتىن بولەك بولمە بەرۋ كەرەك، ۇيگە قوناق شاقىرۋعا، قوعامدىق ورىندارعا بارۋعا، قوعامدىق كولىك پايدالانۋعا دا شەكتەۋ قويىپ جاتىرمىز» ، - دەدى ج. بەكشين.