كوروناۆيرۋس: قازاقستان ازاماتتارىنا تاعى دا بىرنەشە ەلگە بارماۋعا كەڭەس بەرىلدى

نۇر-سۇلتان. قازاقپارات - كوروناۆيرۋس ينفەكتسياسىنان قورعانۋ بويىنشا قازاقستان ازاماتتارىنا بىرنەشە ەلگە بارماۋعا كەڭەس بەرىلدى، دەپ حابارلايدى قازاقپارات ءتىلشىسى.

بۇل تۋرالى ق ر باس مەملەكەتتىك سانيتاريالىق دارىگەرى جانداربەك بەكشين ايتىپ بەردى.

«الەمدە كوروناۆيرۋس بويىنشا جاعداي كۇندە وزگەرىپ تۇر. ق ح ر- دا جاعداي تۇراقتى بولسا، باسقا ەلدەردە جاعداي كۇردەلەنىپ بارادى. مىسالى، كەيىنگى كەزدەرى يران رەسپۋبليكاسىندا جاعداي كۇردەلەنىپ بارادى. رەسمي تۇردە وندا 42 وقيعا تىركەلىپ، ونىڭ 12 ءسى ولىممەن اياقتالدى. وڭتۇستىك كورەيادا 10 ءولىم-ءجىتىم وقيعاسى، يتاليادا – 10، گونكونگتا - 2 جاعداي تىركەلدى. سوندىقتان، رەتتەپ العان 3 ساناتتىڭ ءتىزىمى وزگەرتىلدى»، - دەدى ج. بەكشين ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

دەنساۋلىق ساقتاۋ مينيسترلىگى 1-ساناتتاعى قاۋىپتى ەلدەر تىزىمىنە تاعى ءبىرقاتار مەملەكەتتى ەنگىزگەن.

«بۇرىن ءبىرىنشى ساناتتا تەك ق ح ر بولسا، بۇل تىزىمگە وڭتۇستىك كورەيا، جاپونيا، يتاليا، يران، قىتايدىڭ ارنايى اكىمشىلىك ايماقتارى - گونكونگ، ماكاو، تايۆان ايماعى ەنگىزىلىپ جاتىر. بۇل شەشىم الەمدەگى جاعدايدىڭ كۇردەلەنۋىن كورسەتىپ جاتىر. بۇل ەلدەردەن كەلگەن ازاماتتار 1- ناۋرىزدان باستاپ، ۇيدە كارانتينگە وقشاۋلانادى. ولار ءوز مەكەنجايى بويىنشا وقشاۋلانادى. كۇندەلىكتى جەرگىلىكتى دارىگەرلەر وسى ازاماتتاردى قاراپ شىعىپ، ناقتى تاپسىرما بەرىپ جاتىر»، - دەدى ج. بەكشين.

قاۋىپتىلىگى جاعىنان ەكىنشى ساناتتا ءۇش مەملەكەت بار - سينگاپۋر، تايلاند، مالايزيا.

«ءۇشىنشى ساناتقا - ۆەتنام، گەرمانيا، اۋستراليا، ا ق ش، اراب امىرلىكتەرى، كانادا ەنگىزىلدى. بۇل ەلدەردەن كەلىپ جاتقان ازاماتتار ەركىن جۇرەدى، شارۋالارىمەن اينالىسا الادى. ءبىراق، ولاردىڭ جاعدايىن مەديتسينالىق قىزمەتكەرلەر تەلەفون ارقىلى كۇنارا ءبىلىپ تۇرادى»، - دەدى باس سانيتارلىق دارىگەر.