بەيبىت جيىندار تۋرالى زاڭ جوباسى ۇلتتى بىرىكتىرەتىن قۇجات بولۋى ءتيىس - ەرلان سايروۆ
مۇنداي پىكىردى ۇلتتىق قوعامدىق سەنىم كەڭەسىنىڭ مۇشەسى ەرلان سايروۆ ايتتى، دەپ حابارلايدى قازاقپارات ءتىلشىسى.
«ەڭ الدىمەن وسىلاي ۇستەل باسىنا جينالىپ وتىرعانىمىزدىڭ ءوزى قۋانتادى. ويتكەنى، وسى جەردە مينيسترلىكتىڭ دە، ازاماتتىق قوعامنىڭ دا وكىلدەرى وتىر. وسىنىڭ ءوزى ۇلتتىق ىمىرانىڭ باستالعانىن كورسەتەدى. ەكىنشىدەن، بۇل زاڭ نەگىزىندە پروگرەسس سانالادى. ءبىراق، ىشىندە كوپتەگەن ءارتۇرلى سۇراقتار بار. ديالوگ دەتالدى اشادى دەمەكشى، ونىڭ دەتالدارىن قاراستىرۋ كەرەك»، - دەدى ول «قازاقستان رەسپۋبليكاسىندا بەيبىت جيىندار، شەرۋ، پيكەتتەر، دەمونستراتسيالىق جينالىستاردى وتكىزۋ مەن ۇيىمداستىرۋ ءتارتىبى تۋرالى» زاڭ جوباسىن قوعامدىق تىڭداۋ بارىسىندا.
وسى رەتتە ول اتالعان زاڭ جوباسىن اقىلداسىپ، وي-پىكىرلەردى ورتاعا سالىپ، سودان كەيىن بارىپ بارلىق تاراپ ىمىراعا كەلگەن قۇجاتتى قابىلداۋ قاجەتتىگىن باسا ايتتى.
«ءبىز سوعان قاراي كەلە جاتىرمىز. سوندىقتان وسىنداي كەزدەسۋلەر قاجەت ءارى ءجيى ءوتۋى ءتيىس. سىن دا كەرەك. ويتكەنى، سىن بولماسا مەملەكەتتىك ورگاندار ورنىنان قوزعالمايتىنى راس. ال ەندى زاڭ جوباسى پارلامەنتكە جەتكەن كەزدە دە ول جەردە بەلگىلى ءبىر توپ بولۋى كەرەك دەپ ويلايمىن. ول توپقا حالىقارالىق دەڭگەيدەگى ساراپشىلار كىرۋى ءتيىس. بۇل زاڭ ۇلتتى، مەملەكەتتى بىرىكتىرەتىن قۇجات بولۋى ءتيىس»، - دەدى ەرلان سايروۆ.