قازاقستاندا كۇن جىلىنىپ، اۋا تەمپەراتۋراسى كوتەرىلەدى

نۇر-سۇلتان. قازاقپارات - سينوپتيكتەر 27-29 - اقپان ارالىعىندا قازاقستاندا اۋا رايى قانداي بولاتىنىن ايتتى، دەپ حابارلايدى قازاقپارات «قازگيدرومەت» ر م ك باسپا ءسوز قىزمەتىنە سىلتەمە جاساپ.

قىس اياقتالىپ ۇلگەرمەسە دە، قازاقستاندا كوكتەم ءوز ۇستەمدىگىن ورناتىپ جاتىر. رەسپۋبليكانىڭ بارلىق اۋماعىندا اۋا تەمپەراتۋراسى كليماتتىق نورمادان 5...12°گرادۋس جوعارى بولادى. ەلىمىزدىڭ وڭتۇستىگى مەن وڭتۇستىك-باتىسىندا قار جاۋادى.

تسيكلوندار مەن انتيتسيكلوندار ءبىر-بىرىنە تەز اۋىسىپ، سينوپتيكتەر ولاردى باقىلاۋعا ۇلگەرمەي وتىر. ال ولاردىڭ تەز اۋىسۋى - كوكتەمگى پروتسەستەردىڭ باستالۋىنىڭ نەگىزگى بەلگىسى.

مىنە، الداعى ءۇش تاۋلىكتە قازاقستان ارقىلى سۋىق پوليارلىق جانە اركتيكالىق فرونتتار ۇلكەن جىلدامدىقپەن وتەدى، ونىڭ ارتىنان انتيتسيكلون تارايدى. سودان كەيىن باتىس وبلىستارعا رەسەيدىڭ ەۋروپالىق بولىگىنەن كەزەكتى فرونتتار كەلەدى.

سوندىقتان جاڭبىر جانە جىلبىسقى قار جاۋادى، ارتىنشا كۇن اشىلىپ، كۇن رايى تەز وزگەرەدى. اۋا تەمپەراتۋراسى وتە جوعارى بولادى.