يزرايل سەۋلدەن ۇشىپ كەلگەن تۋريستەردى كەرى قايتاردى
قىتاي، وڭتۇستىك كورەيا جانە ازيانىڭ وزگە ەلدەرىمەن اۋە قاتىناسى توقتاتىلدى. بۇل ەلدەردەن تەك يزرايل ازاماتتارىنا ەلگە قايتۋىنا رۇقسات بار. سەۋلدەن ۇشىپ كەلگەن تۋريستەردى كەرى قايتاردى.
سوڭعى كەزگە دەيىن گەوگرافيالىق ورنالاسۋىنا بايلانىستى يزرايل دەرتتەن امان قالادى دەپ سانالعان. ساياحاتتاۋعا ارنالعان كەمەدە اۋىرعان يزرايلدىكتەر ەلدەن الىس جاپونيادا بولعان، ال ەلدە بىردە- ءبىر ادام ۆيرۋستى جۇقتىرماعان ەدى. الايدا ەلگە ساياحاتتاپ كەلگەن وڭتۇستىك كورەيالىقتار توبىندا جەتى ادامنىڭ بۇل سىرقاتقا شالدىققانى انىقتالدى. بۇل ولار يزرايلدەن كەتكەننەن كەيىن بەلگىلى بولدى. وسى تۋريستتەر ەل اۋماعىنىڭ جارتىسىن ارالاپ، جۇزدەگەن اداممەن بايلانىستا بولعان ەكەن. ولارمەن قاتىناسقان ادامداردى ەكى اپتاعا كارانتينگە ورنالاستىرىپ جاتىر. جالپى يزرالدە مىڭعا جۋىق ادام وقشاۋلاندىرىلدى.
بينيامين نەتانياحۋ، يزرايل پرەمەر- ءمينيسترى:
- ءبىز وزگەرىپ وتىرعان جاعدايعا سايكەس ۇنەمى ساياساتىمىزدى بەيىمدەيمىز. ەڭ الدىمەن وزگە ەلدەردەن يزرايلگە كەلۋگە شەكتەۋ قويامىز. بۇگىن وسى تىزىمگە اۆستراليا مەن يتاليانى قوستىق، قاجەت بولسا وزگە ەلدەردى دە كىرگىزەمىز. ساقتىقتا قورلىق جوق دەپ ايتار ەدىم. دەنساۋلىق ساقتاۋ مينيسترلىگىنە ەرەكشە وكىلەتتىلىك بەرىلدى. ءتىپتى كارانتيننەن باس تارتقانداردى قاماۋعا الۋ قاراستىرىلعان.
ىندەتكە قارسى كۇرەستى تەرروريزمگە قارسى ۇلتتىق ورتالىق باسقاراتىن بولدى. بۇل ەل تاريحىندا بۇرىن- سوڭدى بولماعان جاعداي.
مارك كاتسنەلسون، مەديتسينا سالاسىنىڭ ساراپشىسى:
- ادەتتە بۇل ورتالىق ەل قاۋىپسىزدىگىنە قاتىستى ماسەلەلەرمەن اينالىسادى. كوروناۆيرۋس ستراتەگيالىق تۇرعىدان ازاماتتارىمىزدىڭ دەنساۋلىعىنا اسەر ەتۋى مۇمكىن، سول سەبەپتەن ەندى ولارعا وسىنداي تاپسىرما بەرىلدى.
دەنساۋلىق ساقتاۋ مينيسترلىگى ەڭ الدىمەن اۋرۋحانالار مەن جەدەل مەديتسينالىق قىزمەتكە ناقتى نۇسقاۋلىقتار دايىندادى. بارلىق اۋرۋحانادا كوروناۆيرۋسپەن اۋىرعانداردى وقشاۋلاندىرۋ بويىنشا جاتتىعۋ ءوتتى. دەنساۋلىعىنا كۇدىكتەنگەن ادامدارعا ەمحانالارعا بارۋعا تىيىم سالىندى. دارىگەرلەر ولاردى تەكسەرۋ ءۇشىن ۇيلەرىنە بارادى. ۇكىمەت جاعداي اسقىنعان جاعدايدا شەكارانى تولىعىمەن جابۋ شاراسىن قاراستىرماقشى.
www.24.kz