قۇراننىڭ جاڭا اۋدارماسى مەن ءتاپسىرى وقىرمانعا جول تارتتى – ق م د ب

نۇر- سۇلتان. قازاقپارات - جۋىردا قاسيەتتى قۇراننىڭ جاڭا اۋدارماسى مەن ءتاپسىرى جارىق كوردى. وسى ورايدا ەلورداداعى ق م د ب عيماراتىندا اتالعان كىتاپتىڭ تانىستىرىلىمى ءوتتى، دەپ حابارلايدى قازاقپارات ءتىلشىسى.

اراب تىلىنەن اۋدارعان يسلامتانۋشى، ق م د ب نايب ءمۇفتيى ەرشات وڭعاروۆ. قازاق ءتىلىنىڭ ادەبي مانەرىمەن ورنەكتەپ، رەداكسيالاعان قازاقستان جازۋشىلار وداعىنىڭ مۇشەسى، پروزاشى نۇرجان مۇراتاليەۆ.

«قاسيەتتى قۇران: ماعىناسى مەن تۇسىنىكتەمەلەرى» اتتى ەڭبەكتىڭ تانىستىرىلىمىنا باس ءمۇفتي ناۋرىزباي قاجى تاعان ۇلى، زيالى قاۋىم وكىلدەرى مەن ءدىن قايراتكەرلەرى قاتىستى.

«قازاقستان مۇسىلماندارى ءدىني باسقارماسى بيىل وتىز جىلدىعىن اتاپ وتۋدە. بۇل رەتتە كوپتەگەن يگى شارالار جوسپارلانعان. بۇگىنگى شارانىڭ ماقساتى - قاسيەتتى كىتابىمىز قۇراندى ەلگە قازاق تىلىندە، قازاقتىڭ سالتىنا ساي ءتۇسىندىرىپ جەتكىزۋ. قاسيەتتى قۇراننىڭ اۋدارماسى جانە ونىڭ ءتاپسىرى جارىق كورىپ جاتىر، اللا قالاسا بۇگىن قالىڭ وقىرماعا جول تارتاتىن بولادى. زيالى قاۋىم وكىلدەرىمەن، ءدىن قايراتكەرلەرىمەن بىرگە تۇساۋكەسەرىن وتكىزىپ جاتىرمىز»، - دەدى باس ءمۇفتي.

وسى ورايدا ول اتالعان ەڭبەك جاستاردىڭ مەن جاماعات ءۇشىن قۇراننىڭ ماعىناسى مەن ءتاپسىرىن دۇرىس تۇسىندىرۋگە نەگىزدەلگەنىن اتاپ ءوتتى. اتاپ ايتقاندا، وقىرمانعا جەڭىل ءتۇسىندىرۋ قاراستىرىلعان.

«جاستاردىڭ دەسترۋكتيۆتى ءدىني اعىمداردىڭ جەتەگىنە كەتۋ فاكتورلارىنىڭ ءبىرى - قۇراننىڭ ماعىناسى مەن ءتاپسىرىن دۇرىس تۇسىنبەۋ. كەيدە قۇران اياتتارىن تىكەلەي ماعىناسىندا ءتۇسىنىپ جاتادى. اۋدارما ەرەكشەلىگى - قاسيەتتى اياتتار اراب تىلىندەگى ءتۇپنۇسقادان اۋدارىلعان، اياتتاردىڭ قازاقشا ماعىناسى بەرىلگەن، اياتتىڭ ءتاپسىرى، تۇسىنىكتەمەسى مەن تاريحى جان- جاقتى جازىلعان. سۇرەنىڭ قازىرگى عىلىممەن بايلانىسى باياندالعان، اراب تىلىندەگى اياتتىڭ دۇرىس وقىلۋ ترانسكريپتسياسى بەرىلگەن»، - دەدى ناۋرىزباي قاجى تاعان ۇلى.

كىتاپ كولەمى 1000 بەتتەن اسادى. اۋدارماشى اۋدارما بارىسىندا مىسىر، تۇركيا، اراب مەملەكەتتەرىندەگى ءتۇپنۇسقا قولجازبالارعا سۇيەنە وتىرىپ، ءدىن مەن ءداستۇر ساباقتاستىعىنا ءمان بەرگەن.

«ايتا كەتەر جايت، ەرشات باۋىرىمىز ءال- ماتۋريدي، ءان- ءناسافي، ءال- ءجالالاين، ءال- ءالۋسي سىندى حانافي ءمازھابىنىڭ عۇلاما- عالىمدارى مەن تاپسىرشىلەردىڭ كىتابىنان ءوز نۇسقاسىنان اۋدارىپ شىقتى. بۇل ەڭبەككە بىرنەشە جىلىن سارپ ەتتى. اللا ساۋاپتان جازسىن!»، - دەدى باس ءمۇفتي.

ءوز كەزەگىندە ەرشات وڭعاروۆ ون جىلعا جۋىق ۋاقىتىن اتالعان اۋدارما ەڭبەگىنە بولگەنىن اتاپ ءوتتى.

«جاستاردى رۋحاني تاربيەگە جانە تەرەڭ تانىم الۋعا قۇرال بولادى دەپ سەنەمىن. بۇگىنگى 3 مىڭ دانامەن شىعىپ وتىرعان نۇسقاعا دەمەۋشىلىك جاساعان ازاماتتارعا العىسىمدى ايتامىن»، - دەدى ە. وڭعاروۆ.

اۆتور رۋسلان عابباسوۆ