+7 (701) 759 90 19
11 °С : نۇر-سۇلتان
14 °С : الماتى
USD 447.60 EUR 489.41
RUB 5.71 CNY 63.05
جاڭالىقتار

ەركىن كۇرەستەن باس جاتتىقتىرۋشى اسەت سەرىكبايەۆ: باپكەردىڭ ارمانى - وليمپياداعا تولىق قۇراممەن بارۋ

25 اقپان 14:14
:ءبولىسۋ
ەركىن كۇرەستەن باس جاتتىقتىرۋشى اسەت سەرىكبايەۆ: باپكەردىڭ ارمانى - وليمپياداعا تولىق قۇراممەن بارۋ

نۇر-سۇلتان. قازاقپارات - اسەت سەرىكبايەۆ باپتايتىن ەركىن كۇرەس شەبەرلەرى نيۋ-دەليدە (ءۇندىستان) وتكەن كۇرەس تۇرلەرىنەن ازيا چەمپيوناتىنان ەكى التىن، ءتورت قولا مەدالمەن ەلگە ورالدى.

باس باپكەر جارىستان ەلگە ورالعان بەتتە قازاقپارات ءتىلشىسىنىڭ ساۋالىنا جاۋاپ بەرىپ، «سارىقۇرلىق» بىرىنشىلىگى جايىندا شاعىن سۇحبات بەردى.

- كەشە عانا ءۇندىستان استاناسى نيۋ-دەليدە وتكەن كۇرەس تۇرلەرىنەن ازيا بىرىنشىلىگىنەن ەكى التىن، ءتورت قولا جۇلدەمەن ورالدىڭىزدار. جالپى شاكىرتتەرىڭىزدىڭ جەتىستىگىنە كوڭىلىڭىز تولدى ما؟

- ارينە، كوڭىلىم تولادى. 2 التىن، 4 قولا مەدال - جامان كورسەتكىش ەمەس. جالپى، بالۋاندارىمىز ءۇمىتتى اقتاي ءبىلدى. جوعارى دەڭگەيدە ونەر كورسەتتى. ءبىزدىڭ قۇراما 2018-جىلى دا، 2019-جىلى دا 2 التىن العان بولاتىن. مىنە، بيىل دا سول بيىكتەن كورىنە بىلدىك.

- جارىسقا اتتانباس بۇرىن قانشا مەدال الۋدى جوسپارلاپ ەدىڭىزدەر؟

- باپكەر رەتىندە قۇرلىق بىرىنشىلىگىنەن ءبىر التىن مەدال الساق تا جامان بولماس دەپ جوسپارلاعانمىن. وزدەرىڭىز كورگەندەي، ءبىر ەمەس، ەكى التىنعا قول جەتكىزدىك. جوسپارىمىز ارتىعىمەن ورىندالدى.

- وليمپيادا الدىنداعى «سارىقۇرلىق» دوداسى جالپى نەسىمەن ەستە قالدى؟

- مەن ءۇشىن بۇل دودا ءوزىم باپتايتىن بالۋاندار اراسىنان ەل قورجىنىنا ەكىنشى التىندى سالعان 125 كەلى سالماقتاعى بالۋانىمىز يۋسۋپ باتىرمۋرزايەۆتىڭ جەتىستىگىمەن ەستە قالدى. باتىرمۋرزايەۆ جاس بولا تۇرا، «سارىقۇرلىقتاعى» ساقا بالۋانداردىڭ بارلىعىن جولدان تايدىرىپ، كۇتپەگەن جەردەن ازيا چەمپيونى اتاندى. بولاشاعىنان ءۇمىت كۇتتىرەتىن بالۋان ەكەنىن كورسەتە ءبىلدى.

- جالپى ءوزىڭىز ىشكى ەسەبىڭىزدە كىمدەردەن مەدال كۇتكەن ەدىڭىز؟

- ءبىز ءبارى دە جۇلدەمەن ورالسا ەكەن دەپ تىلەيمىز. جالپى بارعان بالۋاندارىمىزدىڭ بارلىعى قارسىلاستارىن جىعۋعا بار كۇشتەرىن سالدى. ءوز باسىم 57 كەلى سالماقتا ەل نامىسىن قورعاعان نۇريسلام سانايەۆ پەن 86 كەلىدە سىنعا تۇسكەن بالۋانىمىز ازامات داۋلەتبەكوۆتەن مەدال كۇتكەنىم راس. ەكەۋى دە جۇلدەلى ورىنعا سىنىق سۇيەم جەردەن، ناقتىراق ايتساق، قولا مەدال ءۇشىن بەلدەسۋدە قارسىلاستارىنا جول بەرىپ قويدى.

- وتكەن جىلدىڭ كۇزىندە ەلوردامىزدا ليتسەنزيالىق الەم چەمپيوناتى وتكەنى ەسىمىزدە. سول الەمدىك بىرىنشىلىكتە ءسىز باپتايتىن بالۋاندار ءۇش مەدال مەن قوسا توكيو وليمپياداسىنا ءتورت جولداما ۇتىپ الدى. دەمەك، ازىرگە ەركىن كۇرەس شەبەرلەرىندە ءتورت جولداما بار. تولىق قۇرامدا بارۋعا ەندى قانشا جولداما جەتىسپەي تۇر؟

- ءار باپكەردىڭ ارمانى - وليمپيادا ويىندارىنا تولىق قۇراممەن بارۋ. ءوزىڭىز اتاپ وتكەندەي، قازىر ءتورت جولدامامىز بار. ەندى، بىزگە ەكى سالماقتان ەكى جولداما جەتىسپەي تۇر. الدا وليمپيادا جولدامالارى ساراپقا سالىناتىن ەكى ۇلكەن جارىس بار. سول ەكى دودادا جەتپەي تۇرعان ەكى جولدامانى جەڭىپ الساق، تولىق قۇراممەن وليمپياداعا اتتانامىز.

- ەلوردادا وتكەن ليتسەنزيالىق الەم چەمپيوناتىندا ءوز سالماقتارىندا وليمپياداعا جولداما جەڭىپ العان بالۋانداردىڭ ەسىمدەرىن سول كەزدە اتاپ وتكەن ەدىك. ءتورتجىلدىق دوداعا مىندەتتى تۇردە سول بالۋانداردىڭ وزدەرى بارا ما، الدە باراتىن بالۋانداردى باپكەرلەر كەڭەسى شەشە مە؟

- بۇل سۇراققا جاۋاپ بەرۋ ءالى ەرتەرەك. ءوز باسىم الدىن-الا تون پىشكەندى اسا ۇناتا بەرمەيمىن. وليمپيادا ويىندارىنا دەيىن ءالى بەس ايدان استام ۋاقىت بار. وعان دەيىن بىزدە كوپتەگەن جارىستار، جاتتىعۋلار بولادى. وسى جارىستا كەيبىر بالۋاندار جاراقات الىپ قالىپ جاتادى. ونداي ساتتەردە ءبىرنىڭ ورنىنا ءبىرى كەتەتىن جاعدايلار بولادى. سوندىقتان، وليمپياداعا ناقتى كىمدەردىڭ باراتىنى تۋرالى ايتۋ ەرتەرەك.

- الداعى جوسپارلارىڭىز تۋرالى قىسقاشا ايتىپ كەتسەڭىز...

- ءدال قازىرگى جوسپارىمىز، جوعارىدا اتاپ وتكەنىمدەي، وليمپياداعا جولداما بەرەتىن ازيالىق جانە الەمدىك ەكى تۋرنيرگە جاقسى دايىندالىپ، وليمپياداعا تولىق قۇراممەن بارۋ. ارى قاراي وليمپيادادا مەدال الۋ.

- اڭگىمەڭىزگە كوپ راحمەت! ماقسات-تىلەكتەرىڭىز ورىندالا بەرسىن...

اۆتور: كۇنسۇلتان وتارباي



باستى سوزدەر: سپورت,
:ءبولىسۋ
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
باقىتجول كاكەش
باقىتجول كاكەش
954-049
رەداكتور
ريزابەك نۇسىپبەك
ريزابەك نۇسىپبەك
954-049
رەداكتور
بەيسەن سۇلتان
بەيسەن سۇلتان
954-049

مۇراعات