دەنساۋلىق ساقتاۋ مينيسترلىگى كارانتينگە جاتقىزىلعان جولاۋشىلاردان كەشىرىم سۇرادى
بۇل جونىندە ۆەدومستۆونىڭ الەۋمەتتىك جەلىدەگى پاراقشاسىنا سىلتەمە جاساپ قازاقپارات حابارلايدى.
«مۇنداي توتەنشە سانيتارلىق-كارانتين شاراسى كوروناۆيرۋس ينفەكتسياسىنىڭ ورشۋىنە بايلانىستى ازاماتتاردىڭ قاۋىپسىزدىگىن قامتاماسىز ەتۋ ماقساتىندا قابىلداندى. اتالعان ينفەكتسيا بۇگىندە قوعام دەنساۋلىعىنا قاتەر ءتوندىرىپ وتىر. ايتا كەتۋ كەرەك، بۇل شەشىم بارلىق تالاپتارعا ساي، قىسقا مەرزىم ىشىندە قابىلداندى»، - دەپ جازادى مينيسترلىك.
قازىرگى تاڭدا بارلىق جولاۋشىلار تاۋلىك بويى دارىگەرلەردىڭ باقىلاۋىنداعى مەديتسينالىق مەكەمەدە جاتىر. ول نۇر-سۇلتان قالاسىنان 7 شاقىرىم قاشىقتىقتا ورنالاسقان.
ولاردان سىناما الىنىپ، الماتىداعى ايقىمبايەۆ اتىنداعى قاۋىپتى ينفەكتسيالاردى زەرتتەيتىن ۇلتتىق عىلىمي ورتالىققا جونەلتىلگەن.
ەسكە سالا كەتەيىك، كەشە جاپوندىق Diamond Princess لاينەرىنىڭ بورتىندا بولعان قازاقستاننىڭ 4 ازاماتى قازاقستانعا ورالىپ، نۇر-سۇلتان قالاسى 3№ كوپبەيىندى اۋرۋحاناسىنىڭ جانىنداعى ينفەكتسياعا قارسى كورپۋسقا جايعاسقان بولاتىن.
دەنساۋلىق ساقتاۋ مينيسترلىگىنە قاراستى تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتى قازاقستاندا كوروناۆيرۋس ينفەكتسياسىن جۇقتىرعان ادام تىركەلمەگەنىن حابارلايدى. قوسىمشا اقپارات قاجەت بولعان جاعدايدا تاۋلىك بويى قىزمەت ەتەتىن 1406 بايلانىس ورتالىعىنا حابارلاسۋعا بولادى.