باس سانيتارلىق دارىگەر زايسانداعى احۋالعا قاتىستى پىكىر ءبىلدىردى

نۇر- سۇلتان. قازاقپارات - قازاقستاننىڭ باس سانيتارلىق دارىگەرى جانداربەك بەكشين زايسانداعى احۋالعا قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

«ءبىزدىڭ جەرلەستەرىمىزدىڭ ءبىرازى وڭتۇستىك كورەياعا ەمدەلۋگە بارادى. ولاردىڭ يممۋنيتەتى تومەن بولۋى مۇمكىن. بۇل ەلدەردىڭ حالىق تىعىزدىعى جوعارى. سينگاپۋر، گونك- كونگ، تايۆاندا وسىنداي. ارينە بۇل وتە قاۋىپتى. وسى ەلدەرگە بارۋدى جوسپارلاۋدىڭ قاجەتى جوق. ءبىزدى سونداي- اق الاڭداتاتىن - يتاليا ەلى. قازىرگى تاڭدا وندا 144 جاعداي بار. يتاليانىڭ سولتۇستىگىندە ميلاندا كوپتەپ تىركەلۋدە. تەك رەسمي الىنعان دۇنيەجۇزىلىك دەنساۋلىق ساقتاۋ ۇيىمىنىڭ، وسى ەلدەردىڭ دەنساۋلىق ساقتاۋ مينيسترلىكتەرىنىڭ مالىمەتىنەن باسقا ب ا ق- تى ءبىز پايدالانبايمىز» ، - دەدى ول.

جانداربەك بەكشين بۇل رەتتە ەلىمىزدە جاعداي تۇراقتى ەكەنىن جەتكىزدى.

«وتكەن اپتادا مەن ق ح ر- مەن شەكارانى ارالاپ، اۆتوكولىكتىك، تەمىر جول وتكەلدەرىن قاراپ شىقتىم. ول جەردە ناقتى باقىلاۋ بار. باقىلاۋدى كۇشەيتىپ، ءبىز سانيتارلىق 20 دارىگەردى قوسىمشا قوستىق. سوندىقتان تاۋلىك بويى شەكارامىز تەكسەرۋدە. بىزدە ق ح ر- دان اۆتوبۋسپەن، تەمىر جولمەن، رەسمي تۇردە اۋە جولىمەن قازىر كەلىپ جاتقان جولاۋشىلار جوق. وسىعان قاراماستان قايتالاپ ايتقان ەلدەردى ناقتى باقىلاۋعا الدىق. باسقا ەلدەردە كوروناۆيرۋس ءورشىپ بارادى. ول ەلدەردەن كەلۋشىلەردىڭ كەلۋىنە كەدەرگى قويىپ جاتىرمىز. ءاربىر ۇشاق باقىلاۋدا» ، - دەدى ول.

جانداربەك بەكشين سونىمەن قاتار، شىعىس قازاقستاندا، سونىڭ ىشىندە زايسان وڭىرىندە كوروناۆيرۋس جۇقتىرماق تۇگىلى ونداي كۇدىككە ىلىنگەن ەشقانداي ادامنىڭ اۋرۋحاناعا جەتكىزىلمەگەنىن رەسمي تۇردە مالىمدەدى. سونىمەن قاتار، باس سانيتارلىق دارىگەرگە زايساندا جۇمىس ىستەيتىن قىتاي ازاماتتارىنا قاتىستى سۇراق قويىلدى.

«ول ازاماتتار وتكەن جىلدان بەرى جۇمىس ىستەپ كەلەدى. البەتتە ولار ءوز لاگەرىندە، ياعني تۇرعىلىقتى جەردە ەمەس، قالا سىرتىندا جۇمىس ىستەيدى. ەگەر ولار قايتىپ كەلسە، ولار ءوز جاقتارىنداعى لاگەردە 14 كۇندىك كارانتيننەن وتەدى. كەيىن كەلگەن 4 ادام بار. ولاردىڭ كارانتيندەرى بۇگىن اياقتالادى. ەشقانداي ارىز- شاعىم جوق. جاعداي باقىلاۋدا» ، - دەدى ول.