ق ر باس سانيتارلىق دارىگەرى كوروناۆيرۋس ورشىگەن ەلدەرگە ساپارلاماۋعا كەڭەس بەردى

نۇر- سۇلتان. قازاقپارات - قازاقستاننىڭ باس سانيتارلىق دارىگەرى جانداربەك بەكشين كوروناۆيرۋس ينفەكسياسى ورشىگەن ەلدەرگە بارماۋعا كەڭەس بەردى، دەپ حابارلايدى قازاقپارات ءتىلشىسى.

«قازىرگى تاڭدا قىتاي حالىق رەسپۋبليكاسىندا جاعداي تۇراقتى. ونىڭ سەبەبى وتكەن اپتادا كۇندەلىكتى ءوسۋ (كوروناۆيرۋسقا شالدىعۋ جاعدايلارى) ءبىر كۇندە 0,51 پايىز بولعان ەدى. ودان كەيىن 1,1 پايىز (...) مىسالى، وتكەن تاۋلىكتە كۇندەلىكتى ءوسۋ 0,28 پايىزدى كورسەتتى. قازىر ول ەڭ تومەن دەڭگەيدە. ونى قۋانىشتى ءارى جاقسى اقپارات دەپ ايتۋعا بولادى»، - دەدى جانداربەك بەكشين بۇگىن ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

دەسە دە باس سانيتارلىق دارىگەر كەيىنگى كەزدە باسقا ەلدەردە كوروناۆيرۋس ينفەكسياسىنىڭ ءورشۋى الاڭداتىپ وتىرعانىن ايتادى.

«ءوسۋ دەڭگەيى اقپان ايىنىڭ 22 دە 24 پايىز بولسا، وتكەن تاۋلىكتە 21 پايىزدى كورسەتتى. ءابساليۋتتى سانداردى ايتار بولساق، كۇندەلىكتى ءوسۋى - 314 جاعداي بولدى. وتكەن تاۋلىك بويىنشا 347 جاعداي تىركەلدى. سوندىقتان بۇل ماسەلە ءبىزدى وتە الاڭداتادى. سەبەبى وسى ەلدەر قولايسىز ەلدەردىڭ قاتارىنا كىرىپ جاتىر. ولاردىڭ قاتارىندا وڭتۇستىك كورەيا - اۋىرۋ دەڭگەيى بويىنشا ەكىنشى ورىنعا كەلدى. بۇل اۋرۋ كورەيا رەسپۋبليكاسىنىڭ ەكى پروۆينتسياسىندا كوبىنەسە تىركەلۋدە. باسقا دا پروۆينتسيالارىندا 18 جاعداي بولعان»، - دەدى ول.

جانداربەك بەكشين وڭتۇستىك كورەيامەن قازاقستاننىڭ جان- جاقتى قارىم- قاتىناسى بارىن جەتكىزدى. اتاپ ايتقاندا، قازىرگى تاڭدا ول ەلدىڭ اۋماعىندا 23 مىڭ قازاقستان ازاماتى ءجۇر. ودان بولەك زاڭسىز ميگراتسيا دا بار.

«تاعى ءبىزدىڭ الاڭداتاتىن ەل - يتاليا. ول ەلدە رەسمي اقپارات بويىنشا 144 جاعداي، ال جاپونيا ەلىندە 132 جاعداي تىركەلدى. تەڭىزدەگى كرۋيز لاينەرىندە دە 600 دەن استام جاعداي تىركەلگەنى ايتىلعان ەدى. سول لاينەردە 3 جاعداي ولىممەن اياقتالدى. ءبىزدى الاڭداتاتىن ەلدەردىڭ ىشىندە سينگاپۋر (89)، يران (43)، تايلاند (35)، مالايزيا (22)، ۆەتنام (16) بار. مەن بۇل ەلدەردى نەگە اتاپ جاتىرمىن؟ قازاقستان تۇرعىندارىنا ايتقىم كەلەدى: قازىرگى تاڭدا وسى اتالعان ەلدەرگە قاجەتى بولماسا بارۋدان باس تارتۋ كەرەك. نەگە دەسەڭىز جاعداي كۇندە- كۇندە وزگەرىپ تۇر. ءبىر عانا وڭتۇستىك كورەيا ەلىن الىپ قاراساڭىز، ەكى كۇننىڭ ىشىندە بۇل ەل ەكىنشى ورىنعا شىعىپ كەتتى. ەرتەڭ وسى ەلدەردە جاعداي قيىنداۋى مۇمكىن. وسىنى ەستە ساقتاۋ كەرەك. سوندىقتان وسى ەلدەرگە وڭتۇستىك كورەيا، يتاليا، جاپونيا، سينگاپۋر، يران، مالايزيا، اۆستراليا ەلدەرىنەە ساياحاتتى، باسقا دا بولسىن ساپارلاردى جوسپارلاۋدىڭ قاجەتى جوق. نەگە دەسەڭىز جاپونياداعى لاينەر سەكىلدى جاعدايعا ۇشىراۋ قاۋپى بار»، - دەدى ول.