بەكبولات تىلەۋحان: بۇرىن داۋىسى بارلار ءانشى بولاتىن، قازىر اۋزى بارلار ءانشى

نۇر- سۇلتان. قازاقپارات - دەپۋتات بەكبولات تىلەۋحان قازاقستان اۋماعىندا سپورتتى دامىتۋ ءۇشىن ناسيحات شارالارىن قولعا الۋ كەرەكتىگىن ايتتى، دەپ حابارلايدى قازاقپارات ءتىلشىسى.

بۇگىن پارلامەنت ماجىلىسىندە وتكەن ۇكىمەت ساعاتىندا ەلىمىزدە بۇقارالىق سپورتتى دامىتۋ ماسەلەسى قارالدى.

«جالپى، بۇقارالىق سپورت دەگەن نە؟ بۇل ەڭ الدىمەن، حالىقتىڭ دەنساۋلىعى. جاپپاي ەل قيمىلداسا، سپورتپەن شۇعىلدانسا - ول حالىقتىڭ دەنساۋلىعى مىقتى بولادى. بۇل سالانى دامىتۋعا قارجى كەرەك دەپ جاتىرمىز، ول تۇسىنىكتى ماسەلە. ءبىراق يدەولوگيا، ناسيحاتتىڭ ماڭىزى دا كەم ەمەس. مىسالى، تەلەارنانىڭ اقپاراتتىق ىقپالىنىڭ وراسان نارسە ەكەنىن بىلەمىز عوي؟ ! ناسيحاتتىڭ ارقاسىندا قازىر ءانشى ەمەس ادام قالمادى. داۋىسىنىڭ بار- جوعى ءبارىبىر بولىپ تۇر. بۇرىن داۋىسى بارلار ءانشى بولاتىن، قازىر اۋزى بارلاردىڭ ءبارى ءانشى. مۋزىكالىق كۋلتۋرانى قاتىردىق، فيزيچەسكي كۋلتۋرا وڭباي تۇر» ، - دەپ توقتالدى دەپۋتات.

وسى ورايدا ول سپورتتى ناسيحاتتاۋعا ايرىقشا نازار اۋدارۋ قاجەتتىگىن اتاپ ءوتتى.

«قازاق ويىن بالاسى دەپ ايتادى، 13 جاسقا دەيىن ونىڭ ءومىرىنىڭ نەگىزگى ءمانى ويىندا. جۇگىرگەن بالانىڭ دەنساۋلىعى مىقتى بولادى.. . سەمىرىپ كەتكەن، اۋلانى ەكى اينالسا ەنتىگىپ قالاتىن بالانىڭ مايىن سىلىپ، بۇلشىقەتىن قالىپتاستىرۋ ءۇشىن، سونداي- اق كومپيۋتەر نەمەسە سمارتفونعا شۇقشيىپ قالعان بالانى دالاعا الىپ شىعۋ ءۇشىن بۇقارالىق سپورتتى جاقسىلاپ ناسيحاتتاۋىمىز كەرەك ەكەنى تۇسىنىكتى. بۇل ءۇشىن ناسيحات كەرەك!» ، - دەدى بەكبولات تىلەۋحان.

دەپۋتات ەلىمىزدە ات سپورتىن دامىتۋعا ەرەكشە ءمان بەرۋ كەرەكتىگىن، سونداي- اق جۇمىس ورىندارىندا قىزمەتكەرلەردىڭ دەنساۋلىعىن نىعايتۋ جونىندەگى باعدارلامانى ەنگىزە وتىرىپ، كاسىپورىندار مەن ۇيىمداردا دەنە شىنىقتىرۋدى دامىتۋ ءۇشىن جاعداي جاساۋ قاجەتتىگىن اتاپ ءوتتى.

بۇدان بۇرىن حابارلانعانداي، 2019 -جىلدىڭ قورىتىندىسى بويىنشا ەلىمىزدە دەنە شىنىقتىرۋ جانە سپورتپەن جۇيەلى تۇردە شۇعىلداناتىندار سانى 5,7 ميلليون ادامعا جەتكەن. بۇل جالپى حالىقتىڭ 30,6 پايىزى.