قاسىم- جومارت توقايەۆ ە ە ك القاسىنىڭ ءتوراعاسىن قابىلدادى

نۇر-سۇلتان. قازاقپارات - قازاقستان پرەزيدەنتى ەۋرازيالىق ەكونوميكالىق كوميسسيا القاسىنىڭ ءتوراعاسى ميحايل مياسنيكوۆيچتى قابىلدادى، دەپ حابارلايدى اقوردا.

تاراپتار ەۋرازيالىق ەكونوميكالىق وداقتىڭ قازىرگى جاعدايى مەن ونىڭ دامۋ پەرسپەكتيۆالارى جايىندا، ونىڭ ىشىندە قازاقستانمەن وداق اراسىنداعى ىقپالداستىق تۋرالى سويلەستى.

قاسىم- جومارت توقايەۆ ميحايل مياسنيكوۆيچتى جاڭا قىزمەتىمەن قۇتتىقتاپ، ول جەتەكشىلىك ەتەتىن كوميسسيا ەۋرازيالىق ينتەگراتسيانى ودان ءارى تەرەڭدەتۋدە ۇلكەن ۇلەس قوساتىنىنا سەنىم ءبىلدىردى.

- ەۋرازيالىق ەكونوميكالىق وداق شەڭبەرىندەگى ماڭىزدى ورگان سانالاتىن ۇيىمنىڭ جۇمىسىن جەتىلدىرۋدە بەلارۋس ۇكىمەتى مەن پارلامەنتىنىڭ جەتەكشىسى، عىلىم اكادەمياسىنىڭ پرەزيدەنتى بولعان مول تاجىريبەڭىزدى، ءبىلىمىڭىز بەن قۇزىرەتىڭىزدى پايدالاناتىنىڭىزعا ەش كۇماندانبايمىز، - دەدى قازاقستان پرەزيدەنتى.

قاسىم-جومارت توقايەۆ قازاقستاننىڭ تۇڭعىش پرەزيدەنتى - ەلباسى نۇرسۇلتان نازاربايەۆتىڭ ۇسىنىسىمەن ەۋرازيالىق ەكونوميكالىق وداق قۇرۋ جونىندەگى كەلىسىمنىڭ وسىدان 5 جىل بۇرىن ەلوردادا جۇزەگە اسقانىن اتاپ ءوتتى.

- وداق ءوز دامۋىندا ۇلكەن جولدى ارتتا قالدىردى. ارينە، ونى داڭعىل جول دەي المايمىز. سوندىقتان جەتىستىك تە، كەمشىلىك تە بولادى. دەگەنمەن ەۋرازيالىق ەكونوميكالىق وداق ءوز مىندەتىن اقتادى دەپ ەسەپتەيمىز. وداققا مۇشە مەملەكەتتەردىڭ ەرىك-جىگەرىنە قاراي اتالعان ۇيىم الداعى ۋاقىتتا دا دامي بەرەدى، - دەدى مەملەكەت باسشىسى.

ميحايل مياسنيكوۆيچ ءوزىنىڭ كانديداتۋراسى ەۋرازيالىق ەكونوميكالىق كوميسسياسى ءتوراعالىعىنا ۇسىنىلعاندا پرەزيدەنتتىڭ كورسەتكەن قولداۋى مەن سەنىمىنە العىس ايتتى. سونداي-اق وسى قىزمەتتە اتقاراتىن جۇمىسىنىڭ جوسپارىمەن ءبولىستى.