سپورت بويىنشا سىنىپتان تىس ساباق جۇرگىزگەن مۇعالىمدەرگە قوسىمشا اقى تولەنبەك

None
None
نۇر-سۇلتان. قازاقپارات - دەنە تاربيەسى ساباقتارىندا ۇلتتىق سپورت تۇرلەرى بويىنشا مىندەتتى كومپونەنتتى ەنگىزۋ ىسكە اسىرىلادى.

بۇل تۋرالى ق ر مادەنيەت جانە سپورت ءمينيسترى اقتوتى رايىمقۇلوۆا ءمالىم ەتتى، دەپ حابارلايدى قازاقپارات ءتىلشىسى.

«ۇكىمەتتىڭ 2020-جىلعا ارنالعان زاڭ جوبالاۋ جۇمىستارى جوسپارىنا سايكەس، بۇقارالىق سپورتتى دامىتۋ ماسەلەلەرى جونىندەگى كەيبىر زاڭنامالىق اكتىلەرگە وزگەرىستەر مەن تولىقتىرۋلار ەنگىزۋ بويىنشا زاڭنىڭ جانە بۇقارالىق سپورتتى دامىتۋدىڭ 2020-2025-جىلدارعا ارنالعان كەشەندى جوسپارىنىڭ جوباسى ازىرلەندى. دەنە شىنىقتىرۋ مەن سپورتتى دامىتۋ، سونداي-اق دەنە شىنىقتىرۋ جانە سپورتپەن شۇعىلداناتىنداردىڭ سانىن ارتتىرۋ ماقساتىندا ءبىرقاتار ءىس-شارالاردى ىسكە اسىرۋ كوزدەلگەن»، - دەپ توقتالدى مينيستر پارلامەنت ماجىلىسىندەگى ۇكىمەت ساعاتىندا.

وسى ورايدا بالالار مەن جاس وسپىرىمدەردىڭ دەنە شىنىقتىرۋ كلۋبتارى جانە دارىگەرلىك-دەنە شىنىقتىرۋ ديسپانسەرلەرىنىڭ جەلىسىن كەڭەيتۋدى، ءبىلىم بەرۋدىڭ بارلىق دەڭگەيلەرىندە دەنە تاربيەسى ساباقتارىندا ۇلتتىق سپورت تۇرلەرى بويىنشا مىندەتتى كومپونەنتتى ەنگىزۋدى ىسكە اسىرۋ ەسكەرىلگەن.

سونىمەن قاتار، دەنە شىنىقتىرۋ جانە سپورت بويىنشا سىنىپتان تىس ساباقتاردى جۇرگىزگەنى ءۇشىن مۇعالىمدەرگە قوسىمشا اقى ەنگىزۋ، حالىقپەن جۇمىس ىستەۋ ءۇشىن سپورت نۇسقاۋشىلارىن شتاتتىق بىرلىكتەرمەن قامتاماسىز ەتۋ قاراستىرىلعان.

مۇنىمەن قوسا، وقۋشىلار اراسىندا دەنە شىنىقتىرۋ مەن سپورتتى تانىمال ەتۋ ارقىلى سپورتتىق جارىستار سانىن ارتتىرۋ شارالارى جۇزەگە اسىرىلماق.

«زاڭ جوباسى دەنە شىنىقتىرۋ جانە سپورتپەن اينالىسۋ ارقىلى حالىقتىڭ سالاۋاتتى ءومىر سالتىنا ۇمتىلىسىن قالىپتاستىرۋدى كوزدەيدى»، - دەدى ا. رايىمقۇلوۆا.

تاراتىلعان مالىمەتتەرگە قاراعاندا، زاڭ جوباسىن پارلامەنتتىڭ قاراۋىنا 2020-جىلعى ءساۋىر ايىندا ەنگىزۋ جوسپارلانىپ وتىر.

سوڭعى جاڭالىقتار