قازاقستاندا قانشا زەينەتكەر بار؟
بۇل جايىندا ق ر ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆتىڭ ءماجىلىس دەپۋتاتتارىنىڭ ساۋالىنا بەرگەن جاۋابىندا ايتىلعان، دەپ حابارلايدى قازاقپارات ءتىلشىسى.
«2019-جىلدىڭ قورىتىندىسى بويىنشا ەلدە زەينەتكەرلىك جاسقا جەتكەن 2 ميلليوننان استام ادام بار. ولاردىڭ ىشىندە بيۋجەت قاراجاتى ەسەبىنەن ۇيدە كۇتىم جاساۋ جاعدايىندا ارناۋلى الەۋمەتتىك قىزمەتتەرمەن قامتاماسىز ەتىلگەن ەگدە جاستاعى ادامدار سانى 38 مىڭنان اسادى. بۇل قازاقستان رەسپۋبليكاسىنىڭ اۋماعىندا تۇراتىن قارتتاردىڭ بارلىق سانىنىڭ 1,2 پايىزىن قۇرايدى»، - دەدى ول.
سونداي-اق، مينيستر قازاقستان رەسپۋبليكاسىنىڭ حالىقتى الەۋمەتتىك قورعاۋ سالاسىنداعى زاڭناماسىندا حالىقتى الەۋمەتتىك قورعاۋ سالاسىنداعى ۋاكىلەتتى ورگان ايقىندايتىن تارتىپپەن ارناۋلى الەۋمەتتىك قىزمەتتەردىڭ كەپىلدىك بەرىلگەن كولەمىنەن تىس اقىلى نەگىزدە ارناۋلى الەۋمەتتىك قىزمەتتەردى ۇسىنۋ مۇمكىندىگى كوزدەلگەنىن ايتادى.
«مينيسترلىك زەينەتكەرلىك جاسقا جەتكەن ەگدە جاستاعى ادامداردى قولداۋ ءۇشىن كەشەندى شارالار قابىلداۋدا. ماسەلەن، سوڭعى 20 جىلدا زەينەتاقىنىڭ ەڭ تومەنگى مولشەرى شامامەن 12 ەسەگە (3000 نان 36108 تەڭگەگە دەيىن)، زەينەتاقىنىڭ ورتاشا مولشەرى - 14,1 ەسەگە (4179 دان 58725 تەڭگەگە دەيىن)، زەينەتاقىنىڭ ەڭ جوعارى مولشەرى - 12 ەسەگە (7256 دان 87113 تەڭگەگە دەيىن) وسكەنىن ايتا كەتۋ كەرەك. سونىمەن قاتار، قازاقستان رەسپۋبليكاسىن الەۋمەتتىك دامىتۋدىڭ 2030-جىلعا دەيىنگى تۇجىرىمداماسىنا سايكەس مينيسترلىك الەمدىك وزىق تاجىريبەگە جانە «ەستيتىن مەملەكەت» قاعيداتتارىنا سايكەس قارتتاردى قولداۋ جانە ولاردى قوعامعا تارتۋ جونىندە ءبىرقاتار شارا قابىلداۋدى جوسپارلاپ وتىر»، - دەدى ءبىرجان نۇرىمبەتوۆ