شىعىس قازاقستان وبلىسىندا باقىلاۋعا الىنعان ازاماتتاردىڭ بىردە-بىرەۋىندە كوروناۆيرۋس جوق
كوروناۆيرۋسقا قارسى ءىس-ارەكەت ەتۋ ماقساتىندا شىعىس قازاقستان وبلىسىنىڭ تۇرعىندارى ءۇشىن ارنايى وقشاۋلانعان مەديتسينالىق ستاتسيونارلار قاراستىرىلعان.
ق ح ر- دان وبلىس اۋماعىنا قايتىپ كەلەتىن ءاربىر قازاقستان ازاماتىن شەكارادا مەديتسينا قىزمەتكەرلەرى تەكسەرەدى. ەگەر جوتەل، تۇماۋ، دەنە قىزۋى جانە كوروناۆيرۋستىڭ وزگە بەلگىلەرى بولماسا، قازاقستان ازاماتى ارنايى مەديتسينالىق ستاتسيونارعا 14 كۇن مەرزىمگە باقىلاۋعا ورنالاستىرىلادى. وسى كەزەڭ وتكەننەن كەيىن اۋرۋدىڭ قانداي دا ءبىر بەلگىلەرى بولماعان جاعدايدا ول ازامات ستاتسيوناردان شىعارىلادى.
كوروناۆيرۋستىق ينفەكتسيا سيمپتومدارى انىقتالعان جاعدايدا ناۋقاس بىردەن ينفەكتسيالىق اۋرۋحاناعا جاتقىزىلادى.
ش ق و دەنساۋلىق ساقتاۋ باسقارماسى باسشىسى ءىلياس مۇحامەدجاننىڭ ايتۋىنشا، وڭىردەگى مەديتسينالىق ۇيىمدار قاجەتتى ءدارى-دارمەكتەرمەن، ماسكالارمەن، قولعاپتارمەن، سونداي-اق قورعاۋ كوستيۋمدەرىمەن قامتاماسىز ەتىلگەن.
قازىرگى تاڭدا ارنايى مەديتسينالىق ستاتسيوناردا 15 ادام باقىلاۋدا جاتىر (11 قازاقستان ازاماتى جانە 4 ق ح ر ازاماتى). بۇگىندە باقىلاۋعا الىنعان ازاماتتاردىڭ بىردە-بىرەۋىندە كوروناۆيرۋس بەلگىلەرى انىقتالعان جوق.
قىتاي ازاماتتارى قازاقستانعا ءۇشىنشى ەلدەردەن كەلگەن، ولار ترانزيتتىك جولاۋشىلار بولىپ تابىلادى جانە مەديتسينالىق تەكسەرۋ اياقتالعاننان كەيىن (14 كۇن) ەلدەن كەتەدى.