باسكەتبول: ەۋروليگا ويىنىندا تورەشىلىك ەتكەن بريگاداعا شابۋىل جاسالدى

نۇر-سۇلتان. قازاقپارات - افينىدا ەۋروليگانىڭ گرەكتىڭ پاناتينايكوس« كومانداسى مەن يسپاندىق «بارسەلونا» اراسىنداعى ماتچتا تورەشىلىك ەتكەن بريگاداعا ويىن بىتكەن ساتتە شابۋىل جاسالعان.

بۇل تۋرالى Sport24.gr پورتالى حابارلادى.

تورەشىلەرگە ويىننان سوڭ تاكسيگە وتىرىپ، قوناق ۇيگە ورالعان كەزىندە شابۋىل جاسالعان. موتوتسيكلگە مىنگەن بەلگىسىز بىرەۋلەر ماشينانىڭ تەرەزەسىن سىندىرعان. سالدارىنان 54 جاستاعى لۋيدجي لامونيكا جاراقاتتانىپ، اۋرۋحاناعا جەتكىزىلدى.

ال كەزدەسۋ بولسا يسپاندىق كوماندانىڭ جەڭىسىمەن، 92:81 ەسەبىمەن اياقتالدى.

لامونيكا ەۋروپادا باسكەتبولىنداعى تانىمال تورەشىلەردىڭ ءبىرى بولىپ ەسەپتەلەدى.

ول بەس دۇركىن ەۋروپا چەمپيوناتى فينالىندا، سونداي-اق 2008 جانە 2012-جىلدارداعى وليمپيادالىق ويىنداردا تورەشىلىك ەتكەن.