ەلوردا تۇرعىندارى اۋلا سىپىرۋشىعا العىس ايتتى

نۇر-سۇلتان. قازاقپارات - ەلوردا تۇرعىندارى جۇمىسىنا ادال اۋلا سىپىرۋشىعا العىس ءبىلدىردى، دەپ حابارلايدى قازاقپارات ءتىلشىسى.

ەلورداداعى «كەرەمەت» تۇرعىن ءۇيىنىڭ تۇرعىندارى اۋلا سىپىرۋشىعا العىس ايتىپ، سىيلىق بەردى.

«وسى ۇيدە تۇرعانىما ۇزاق جىل بولدى. اۋلا سىپىراتىن اتانىڭ جۇمىسىنا ادالدىعى ءۇي تۇرعىندارىنىڭ كوڭىلىنەن شىعادى. باقىتكەلدى اتا اۋلانى عانا ەمەس، تۇرعىن ۇيدەن تىس جولداردىڭ دا قارىن كۇرەپ، جول سالىپ قويادى. ونىڭ بۇل ەڭبەگىن جەرگە قالدىرماي، كورشىلەرمەن بىرىگىپ، سىيلىق جاساۋعا شەشىم قابىلدادىق. سىيلىقتى تۋعان كۇنىنە وراي بەرەيىك دەپ ەدىك، تۋعان كۇنىنە بىرنەشە اي بار ەكەن، سول سەبەپتى وسى كۇنى سىيلايىق دەپ ۇيعاردىق»، - دەيدى «كەرەمەت» تۇرعىن ءۇيىنىڭ تۇرعىنى ارتەم الداگاروۆ.

اۋلا سىپىرۋشى باقىتكەلدى اتا كەڭەسوۆ وسى ءۇيدىڭ اۋلاسىن تازالاپ جۇرگەنىنە بەسىنشى جىل بولعانىن ايتتى.

«جاسىم 68 دە. ءۇش نەمەرەنىڭ اتاسىمىن. ءوزىم دە وسى ۇيدە تۇرامىن. استاناعا كوشىپ كەلگەنگە دەيىن جەزقازعانداعى» قازاق مىستا «جۇمىس ىستەگەنمىن. ءوزىم تازالىقتى، تياناقتىلىقتى جاقسى كورەمىن، سول سەبەپتى قاردى ۋاقتىلى تازالاپ، كورشىلەرىمە تاس جولعا شىعاتىن جولدى اشىپ قويامىن. قانداي ماماندىق، قاي سالادا جۇرگەنىڭ - ماڭىزدى ەمەس. ماڭىزدىسى - ءوز جۇمىسىڭا ادال بولۋىڭ»، - دەيدى باقىتكەلدى اتا.