الماتىدا كوروناۆيرۋستىڭ الدىن الۋ جۇمىستارى قالاي جۇرگىزىلۋدە

الماتى. قازاقپارات- الماتى حالىقارالىق اۋەجايىندا قالا اكىمى باقىتجان ساعىنتايەۆتىڭ تاپسىرماسىمەن قۇرىلعان كوروناۆيرۋستىڭ الدىن الۋ جونىندەگى وڭىرلىك شتابتىڭ وتىرىسى ءوتتى، دەپ حابارلايدى قازاقپارات ءتىلشىسى.

جيىندا شاھاردىڭ اعىمداعى ەپيدەميولوگيالىق جاعدايى مەن ۇشىپ كەلەتىن حالىقارالىق رەيستەردى باقىلاۋ ءۇشىن جۇرگىزىلەتىن سانيتارلىق-كارانتيندىك شارالاردىڭ بارىسى پىسىقتالدى.

1- اقپاننان باستاپ مەديتسينا قىزمەتكەرلەرىنىڭ جانە ۋاكىلەتتى مامانداردىڭ كومەگىمەن مەگاپوليستىڭ حالىقارالىق اۋەجايىنا كەلەتىن بارلىق حالىقارالىق رەيستەرگە تەكسەرۋ جۇرگىزىلۋدە.

اۋەجاي اۋماعىندا تاۋلىگىنە 30 دان استام ەپيدەميولوگ جۇمىس ىستەيدى. سونداي-اق لاۋازىمدى تۇلعالاردىڭ ءوزارا ءىس-قيمىل الگوريتمى تەمىرجول ستانسالارىندا، اۆتوموبيل وتكەلدەرىندە دە ساقتالعان.

قالانىڭ مەديتسينالىق ۇيىمدارى كوروناۆيرۋستىق ينفەكتسيانى باقىلاۋ مەن ونىڭ الدىن الۋ ءۇشىن كۇشەيتىلگەن شارالاردى جۇزەگە اسىرادى. ۇلتتىق ساراپتاما ورتالىعى بازاسىندا 200 دەن استام جاعىندى سىناما زەرتتەلدى. ولاردىڭ ەشبىرىندە كوروناۆيرۋس انىقتالمادى. سونىمەن قاتار، مەگاپوليستە 100 مىڭنان استام مەديتسينالىق بەتپەردە مەن 700 دەن استام ءدارى-دارمەك قورى بار.

جالپى قالادا بارلىق قاجەتتى قورعانىس قۇرالدارى تولىقتاي جەتكىلىكتى. سونداي-اق سانيتارلىق- اعارتۋ جۇمىستارى كۇشەيتىلىپ، ساۋدا ۇيلەرى مەن بازارلاردا سانيتارلىق باقىلاۋ شارالارىنىڭ ساقتالۋىنا تەكسەرۋ جۇرگىزىلۋدە. اقپاراتتىق-ءتۇسىندىرۋ جۇمىستارى اياسىندا كوروناۆيرۋستىق ينفەكتسيانىڭ الدىن الۋ بويىنشا 18 مىڭعا جۋىق جادىناما تاراتىلدى.

ماماندار قالا تۇرعىندارىنان دەنساۋلىقتارىنا ەرەكشە نازار اۋدارىپ، ينفەكتسيانىڭ الدىن الۋ شارالارىن ساقتاۋدى سۇرايدى:

• دەنە قىزۋىن كۇنىنە كەمىندە 2 رەت ولشەۋ؛

• ءۇي-جايلاردى كۇنىنە كەمىندە 2 رەت جەلدەتۋ؛

• ىلعالدى تازالىق جۇمىستارىن كۇن سايىن جۇرگىزۋ؛

• قولدى سابىنمەن ءجيى جۋۋ؛

• جەكە ىدىس، جەكە گيگيەنا قۇرالدارىن (سۇلگى، سابىن، ءتىس پاستاسى، ۇستارا اسپاپتارى جانە ت. ب.) پايدالانۋ.

سونداي-اق جرۆي مەن تۇماۋدى جۇقتىرۋ قاۋپى جوعارى كەزەڭدە، ءبىرقاتار ەلدەردە ۆيرۋستىق ينفەكتسيالاردىڭ تارالۋى بويىنشا جاعدايدى ەسكەرە وتىرىپ، شاھار تۇرعىندارىنا ادام كوپ جينالاتىن جەردەن اۋلاق بولۋعا، قاۋىپتى ايماقتارعا شىقپاۋعا كەڭەس بەرىلەدى.

دەنە قىزۋى بار ادامداردىڭ قوعامدىق ورىندارعا بارماي، دەر كەزىندە مەديتسينالىق كومەككە جۇگىنۋ، سونداي-اق جەدەل رەسپيراتورلىق ينفەكتسياسىنىڭ بەلگىلەرى بار جانداردىڭ «جوتەلۋ ادەبىن» ساقتاعاندارى ابزال.

قازاقستان اۋماعىندا كوروناۆيرۋس ماسەلەلەرى جونىندە تاۋلىك بويى 1406 ءنومىرى بويىنشا ءبىرىڭعاي call-ورتالىق جۇمىس ىستەيدى. كۇدىك تۋعىزعان جانە مەديتسينالىق كومەكتىڭ تاپشىلىعى ورىن العان جاعدايدا حابارلاسۋعا بولادى.