ليتۆادا اباي مەن ءال-فارابي تۋرالى كىتاپتار تانىستىرىلدى

None
None
نۇر-سۇلتان. قازاقپارات - ءال-فارابي اتىنداعى قازاق ۇلتتىق ۋنيۆەرسيتەتىنىڭ «قازاق ۋنيۆەرسيتەتى» باسپا ءۇيى قازاقستان رەسپۋبليكاسىنىڭ ليتۆاداعى ەلشىلىگىمەن جانە ليتۆانىڭ «جارا» باسپا ۇيىمەن بىرلەسىپ، ءال-فارابيدىڭ 1150 جىلدىعى مەن اباي قۇنانباي ۇلىنىڭ 175 جىلدىعىنا وراي XXI حالىقارالىق ۆيلنيۋس كىتاپ كورمەسىنە قاتىسۋدا، دەپ حابارلايدى قازاقپارات ءتىلشىسى.

بۇل تۋرالى قازاقستان رەسپۋبليكاسىنىڭ ليتۆاداعى ەلشىلىگى ءمالىم ەتتى.

«ليتۆالىق وقىرمانداردىڭ نازارىنا شىعىستىڭ ۇلى ويشىلى ءابۋ ناسىر ءال-فارابيدىڭ جانە قازاق اعارتۋشىسى اباي قۇنانباي ۇلى تۋرالى جازىلعان ەلۋدەن استام كىتاپ ۇسىنىلدى»، دەلىنگەن اتالعان حابارلامادا.

كورمە بارىسىندا قازاقستان جانە ليتۆا اراسىندا سەرىكتەستەرىمەن كەلىسسوزدەر جۇرگىزىلىپ، ەلباسىنىڭ «رۋحاني جاڭعىرۋ» جانە «ۇلى دالانىڭ 7 قىرى» اتتى باعدارلامالىق ماقالالارىن ىسكە اسىرۋ اياسىندا عىلىمي جانە كوركەم ادەبيەت سالاسىنداعى بىرلەسكەن جوبالار جۇرگىزۋ تۋرالى كەلىسىمشارتتارعا قول قويىلدى.

حالىقارالىق ۆيلنيۋس كىتاپ كورمەسى بالتىق ەلدەرىندە ەڭ ءىرى جانە ماڭىزدى كىتاپ كورمەسى بولىپ سانالادى. 4 كۇندىك كورمەدە 500 دەن استام مادەني ءىس-شارالار وتكىزىلەدى دەپ جوسپارلانىپ، ليتۆا جانە مەملەكەت اۋماعىنان 60000 نان استام كورەرمەن كەلەدى دەپ كۇتىلۋدە.

اۆتور: كۇنسۇلتان وتارباي

سوڭعى جاڭالىقتار