قورداي اۋدانىنا جاڭا اكىم تاعايىندالدى

تاراز. قازاقپارات – ق ر پرەزيدەنتى اكىمشىلىگى جانە اۋداندىق ءماسليحات دەپۋتاتتارىنىڭ كەلىسىمىمەن جامبىل وبلىسى قورداي اۋدانىنا اكىم بولىپ رۇستەم داۋلەت تاعايىندالدى، دەپ حابارلايدى قازاقپارات.

ايماق باسشىسى بەردىبەك ساپاربايەۆ جاڭا اكىمدى اۋدان اكتيۆىنە تانىستىردى.

ءوڭىر باسشىسى جاڭا اكىمگە اۋداننىڭ الەۋمەتتىك- ەكونوميكالىق دامۋى، زاڭدىلىق پەن قۇقىقتىق ءتارتىپتى ساقتاۋ، قوعامداعى بىرلىك پەن كەلىسىمدى نىعايتۋ بويىنشا ءبىرقاتار مىندەتتەر جۇكتەدى.

«ءبىز اۋدانداعى تۇراقتىلىق پەن قاۋىپسىزدىكتى قامتاماسىز ەتۋ ءۇشىن جاعدايدى قولعا الدىق. بۇل - مەملەكەت باسشىسىنىڭ تاپسىرماسى. زاڭ بۇزعاندار جاۋاپ بەرەدى» ، - دەدى ب. ساپاربايەۆ.

سونداي- اق، اۋداننىڭ جاڭا باسشىسىنا كوكتەمگى ەگىس جۇمىستارىنا دايىندىق بارىسىن باقىلاۋعا الۋ، ءبىلىم جانە مەديتسينالىق قىزمەت كورسەتۋ ساپاسىن جاقسارتۋ، جاستار اراسىندا تاربيە جۇمىسىن كۇشەيتۋ بويىنشا ءتيىستى شارالار قابىلداۋدى تاپسىردى.

سونىمەن قاتار، بەردىبەك ساپاربايەۆ اۋدان تۇرعىندارىن الىپ- قاشپا اڭگىمەلەر مەن ارانداتۋعا سەنبەي، تەك رەسمي اقپارات كوزدەرىنە سەنىم ارتۋعا شاقىردى.

ايتا كەتەيىك، رۇستەم رىسباي ۇلى داۋلەت 1974 -جىلى جامبىل وبلىسىندا تۋعان. ءبىلىمى جوعارى، 1996 -جىلى جامبىل جوعارى كاسىپكەرلىك مەكتەبىن «كاسىپكەر- ماركەتولوگ» ، 2003 -جىلى قازاقستان رەسپۋبليكاسى پرەزيدەنتى جانىنداعى مەملەكەتتىك باسقارۋ اكادەمياسىن «مەملەكەتتىك باسقارۋ» ، 2010 -جىلى م. ح. دۋلاتي اتىنداعى تاراز مەملەكەتتىك ۋنيۆەرسيتەتىن «قۇقىق تانۋ» ماماندىعى بويىنشا بىتىرگەن.

ەڭبەك جولىن 1994 -جىلى «بوستاندىق» اكتسيونەرلىك قوعامىندا قاراپايىم جۇمىسشى بولىپ باستاعان.

ءار جىلدارى تالاس اۋدانى بوستاندىق اۋىلدىق وكرۋگى اكىمىنىڭ ورىنباسارى، اكىمى، قاراتاۋ قالاسى اكىمىنىڭ ورىنباسارى، قازاقستان رەسپۋبليكاسى پارلامەنتى سەناتى اپپاراتىنىڭ كەڭەسشىسى، قازاقستان رەسپۋبليكاسى يندۋستريا جانە ساۋدا مينيسترلىگىنىڭ ساۋدا كوميتەتىنىڭ باسقارما باستىعى، «ALIT» ج ش س باس ديرەكتورىنىڭ ورىنباسارى، قازاقستان رەسپۋبليكاسى پارلامەنتى سەناتى ءتوراعاسى ورىنباسارىنىڭ كومەكشىسى، قازاقستان رەسپۋبليكاسى پارلامەنتى سەناتى دەپۋتاتىنىڭ كومەكشىسى، جامبىل اۋدانى اكىمىنىڭ ورىنباسارى، جامبىل جانە شۋ اۋداندارىنىڭ اكىمى، تاراز قالاسىنىڭ اكىمى قىزمەتتەرىن اتقارعان.

2018 -جىلدىڭ ءساۋىر ايىنان باستاپ جامبىل وبلىسى اكىمىنىڭ كەڭەسشىسى، 2019 -جىلعى ساۋىردەن باستاپ جامبىل وبلىسى اكىمى اپپاراتىنىڭ باسشىسى قىزمەتىن اتقارىپ كەلدى.