ق ر پرەزيدەنتى: قازاقستاندىق بانكتىڭ جۇمىسىنا تەحنيكالىق يننوۆاتسيالاردى ەنگىزۋ ماڭىزدى

نۇر- سۇلتان. قازاقپارات – ق ر پرەزيدەنتى قاسىم- جومارت توقايەۆ Kaspi.kz كومپانياسىنىڭ نەگىزىن قالاۋشىلار ۆياچەسلاۆ كيم مەن ميحايل لومتادزەنى قابىلدادى، دەپ حابارلايدى قازاقپارات اقورداعا سىلتەمە جاساپ.

Kaspi.kz ديرەكتورلار كەڭەسىنىڭ ءتوراعاسى ۆياچەسلاۆ كيم مەن باسقارما ءتوراعاسى ميحايل لومتادزە پرەزيدەنتكە سيفرلىق قىزمەت كورسەتۋ سەرۆيسىنىڭ جانە ءتيىستى ەكوجۇيەنىڭ دامۋ ستراتەگياسى، سونداي- اق، قازاقستانداعى ەلەكتروندى كوممەرتسيانىڭ ءوسۋ پەرسپەكتيۆالارى تۋرالى باياندادى. اسىرەسە كومپانيانىڭ شاعىن جانە ورتا بيزنەسكە قولداۋ كورسەتۋ جونىندەگى جوسپارىنا ەرەكشە ءمان بەرىلدى.

مەملەكەت باسشىسىنا Kaspi.kz كومپانياسىنىڭ اكسيالارىن الداعى ۋاقىتتا لوندون قور بيرجاسى مەن استانا حالىقارالىق قارجى ورتالىعىنىڭ الاڭدارىنا اشىق تۇردە ورنالاستىرۋعا دايىندىق جايى ايتىلدى.

پرەزيدەنت قازاقستاندىق بانكتىڭ جۇمىسىنا تەحنيكالىق يننوۆاتسيالاردى ەنگىزۋدىڭ ماڭىزدى ەكەنىن اتاپ ءوتتى.