قازاقستاندا ءبىر عانا جەكە كۋالىكپەن جۇمىسقا ورنالاسۋعا بولادى - مينيسترلىك

نۇر- سۇلتان. قازاقپارات – ق ر ەڭبەك جانە حالىقتى الەۋمەتتىك قورعاۋ ۆيتسە- ءمينيسترى ناريمان مۇقىشيەۆ جۇمىسپەن قامتۋ سالاسىنداعى جاڭا وزگەرىستەر تۋرالى ايتىپ بەردى، دەپ حابارلايدى قازاقپارات.

ونىڭ ايتۋىنشا، جۇمىسپەن قامتۋ سالاسىندا enbek.kz ەلەكتروندى ەڭبەك بيرجاسى جوباسى مەن ەلەكتروندى ەڭبەك شارتتارىن ەسەپكە الۋ جۇيەسى جۇزەگە اسىرىلۋدا.

« enbek.kz ەلەكتروندى ەڭبەك بيرجاسى ارقىلى ەكى جىلدا 1 ميلليون استام ادام جۇمىسقا ورنالاسقان. پورتال اشىلعان ساتتەن بەرى 913 مىڭ جۇمىس ىزدەۋشى مەن 192 مىڭ جۇمىس بەرۋشى تىركەلگەن. ءدال وسى ەڭبەك بيرجاسى اشىلعان سوڭ ەلىمىزدەگى جۇمىسپەن قامتىلعاندار سانى %17 ارتتى» ، - دەدى ۆيتسە- مينيستر ورتالىق كوممۋنيكاتسيالار قىزمەتىندە وتكەن بريفينگتە.

وتكەن جىلى دەنساۋلىق ساقتاۋ مينيسترلىگىمەن بىرلەسىپ، «ديپلوممەن اۋىلعا» باعدارلاماسى اياسىندا مەديتسينالىق جوو ماماندارىنا وزدەرى باراتىن ەلدىمەكەندەردى تاڭداۋ مۇمكىندىگى بەرىلگەن.

«بۇرىن ەلدىمەكەندى تاڭداۋ ءۇشىن اكىمدىكتەرگە جۇگىنۋ قاجەت ەدى. بيىل ەلەكتروندى ەڭبەك بيرجاسىنا مەملەكەتتىك قىزمەتتەگى بوس جۇمىس ورىندارىن شىعارۋدى جوسپارلاپ وتىرمىز. رەسپۋبليكا بويىنشا بارلىق بوس جۇمىس ورىندارى وسى جۇيەگە توپتاستىرىلادى. مەملەكەتتىك قىزمەت ىستەرى اگەنتتىگىمەن ءتيىستى جۇمىس جۇرگىزىلدى» ، - دەدى ن. مۇقىشيەۆ.

ال «ەلەكتروندىق ەڭبەك شارتتارىن ەسەپكە الۋدىڭ ءبىرىڭعاي جۇيەسى» ارقىلى ءبىر عانا جەكە كۋالىكپەن جۇمىسقا ورنالاسۋعا بولادى.

«بۇرىن جۇمىس بەرۋشىنىڭ تالابىمەن بىرنەشە قۇجات جيناۋعا تۋرا كەلەتىن. شارتتاردىڭ ەلەكتروندى تۇردە ساقتالۋى جۇمىس بەرۋشىلەردىڭ شارتتى باسىپ شىعارۋ جانە ساقتاۋ شىعىندارىن، وسى پروتسەستى جۇرگىزۋ ءۇشىن شتاتتا بىرنەشە ادامنىڭ بولۋى سياقتى شىعىندارىن ازايتادى» ، - دەدى ۆيسە- مينيستر.

اتالعان پيلوتتىق جوبا 2018 -جىلى اشىلدى جانە بۇل جۇيەگە 26 مىڭ ۇيىم تىركەلدى، 1 ميلليون استام ەڭبەك شارتتارى ەنگىزىلدى.

«بۇل جوبانىڭ ەنگىزىلۋى ەڭبەك قۇقىقتارىنىڭ ساقتالۋىنا، جالعان قۇجات جاساۋ قاۋپىن ازايتۋعا كومەكتەسەدى. بيىل ەڭبەك كودەكسىنە ەنگىزىلگەن تۇزەتۋلەر قابىلدانىپ، شارتتاردى وسى جۇيەدە جۇرگىزۋ مىندەتتى بولادى دەپ سەنەمىز. بۇدان باسقا، ءبىز قىزمەتكەردىڭ جەكە ءىسىن اۆتوماتتاندىرۋ ءۇشىن جۇمىس ىستەپ جاتىرمىز» ، - دەدى ن. مۇقىشيەۆ.