دانيال احمەتوۆ مايقاپشاعاي كەدەن بەكەتىنە بارىپ، قىتايمەن اراداعى شەكارانىڭ جابىق ەكەنىنە كوز جەتكىزدى

وسكەمەن. قازاقپارات - بۇگىن وبلىس اكىمى دانيال احمەتوۆ جەتەكشىلىك ەتەتىن كوميسسيا زايسان اۋدانىندا ەكى توپقا ءبولىنىپ جۇمىس جۇرگىزدى، دەپ حابارلايدى قازاقپارات شىعىس قازاقستان وبلىسىنىڭ اقپارات ورتالىعىنا سىلتەمە جاساپ.

بۇگىن وبلىس اكىمى جەتەكشىلىك ەتەتىن كوميسسيا ەكى توپقا ءبولىنىپ جۇمىس جۇرگىزدى. دانيال احمەتوۆ باستاعان ءبىر توپ مايقاپشاعاي كەدەن بەكەتىنە بارىپ، قىتايمەن اراداعى شەكارانىڭ جابىق ەكەنىنە كوز جەتكىزدى.

ال كوميسسيانىڭ ەكىنشى توبى جول قۇرىلىسىمەن اينالىساتىن قىتايلىق كومپانيانىڭ 8, 10-ۋچاسكەسىندە بولدى. مۇنداعى قىتاي جۇمىسشىلارىنىڭ ۆيزالارىن تەكسەردى. ولاردىڭ بارلىعى دا قازاقستان اۋماعىنا بىلتىر، ياعني كوروناۆيرۋس شىقپاي تۇرعان كەزدە كىرگەندەرى بەلگىلى بولدى.

سونىمەن قاتار، وبلىس اكىمى زايسانداعى ءا. مولداعۇلوۆا كوشەسىنىڭ تۇرعىندارىمەن كەزدەسىپ، ۇيلەرگە گاز تارتۋ ماسەلەسىن قاراستىردى. حالىقتىڭ ماسەلەسىنە قۇلاق اسقان ءوڭىر باسشىسى كوشەگە گاز قۇبىرىن تارتۋعا بيۋدجەتتەن 100 ميلليون تەڭگە قاراجات قاراستىرۋدى تاپسىردى.

ەسكە سالا كەتەيىك، بۇعان دەيىن وبلىس اكىمدىگى زايسان اۋدانىنداعى اۋرۋحانالارعا كوروناۆيرۋس جۇقتىرعان قىتاي ازاماتتارى جاتقىزىلادى دەگەن اقپاراتتىڭ جالعان ەكەنىن مالىمدەگەن ەدى.

«قىتايمەن ەكى اراداعى شەكارا جابىلدى. ال سول ەلدەن كەلگەن ءبىزدىڭ 5 ازاماتىمىز وقشاۋلانىپ، كارانتينگە جاتقىزىلادى» ، - دەدى دانيال احمەتوۆ.

دەنساۋلىق ساقتاۋ ءمينيسترى ەلجان ءبىرتانوۆ تا زايسانداعى جاعدايعا قاتىستى پىكىر ءبىلدىردى.