16:01, 21 - اقپان 2020 | GMT +6
كرۋيز لاينەرىندەگى قازاقستاندىق ازاماتتار ەرتەڭ ەلگە ورالادى
نۇر- سۇلتان. قازاقپارات - جاپونيادا كارانتيندە تۇرعان كرۋيز لاينەرىندەگى قازاقستاندىق جولاۋشىلار ەلگە قايتۋعا دايىندالىپ جاتىر، دەپ حابارلايدى قازاقپارات سىرتقى ىستەر مينيسترلىگىنە سىلتەمە جاساپ.
قازاقستاننىڭ جاپونياداعى ەلشىلىگىنىڭ اقپاراتىنا سايكەس، بۇگىن «Diamond Princess» كرۋيز لاينەرىندە بولعان تاعى ەكى ازاماتىمىز جەرگە ءتۇسىرىلدى.
«ولار قازىر توكيو قوناق ۇيلەرىنىڭ بىرىندە دەمالۋدا. وسىلايشا، اتالمىش لاينەردە بولعان ءبىزدىڭ بارلىق ازاماتىمىز كوروناۆيرۋستى انىقتايتىن تەستىدەن ءوتىپ، ۆيرۋس جۇقتىرماعانى بەلگىلى بولدى. ولار ەرتەڭ ەلگە ورالادى دەپ كۇتىلۋدە» دەلىنگەن حابارلامادا.
ءبىزدىڭ توكيوداعى ديپلوماتتار لاينەردە قازاقستان ازاماتتارى بار ەكەنى بەلگىلى بولعان ساتتەن باستاپ ولارمەن تۇراقتى بايلانىس ورناتىپ، قاجەتتى بارلىق كونسۋلدىق- قۇقىقتىق كومەكتى كورسەتتى.