مەملەكەت باسشىسى ازىرەت- سۇلتان مەشىتىنە باردى
قازاقستان پرەزيدەنتى باس ءمۇفتيدى جاڭا لاۋازىمىمەن قۇتتىقتاپ، الداعى قىزمەتىنە تابىس تىلەدى.
كەزدەسۋ بارىسىندا ەلدەگى تاتۋلىق پەن تۇراقتىلىقتى ساقتاۋ، ءدىن ارقىلى ازاماتتاردى كەلىسىم مەن ىنتىماققا شاقىرۋ، رۋحاني باعدار بەرۋ قاجەتتىلىگى مەن جات ءدىني اعىمداردىڭ زياندى ارەكەتتەرى جايىندا ايتىلدى.
- حالىقتى تاتۋلىققا، بىرلىككە، ءپاتۋاعا شاقىرۋ كەرەك. قازىرگى ۋاقىتتا دۇنيە جۇزىندە ءارتۇرلى جات ۇدەرىستەر پايدا بولىپ جاتىر. سوندىقتان بۇعان تىيىم سالىپ، جول بەرمەۋگە ءتيىسپىز. ەل مۇددەسىنە قىزمەت ەتىپ، وسى باعىتتا دۇرىس ۇگىت-ناسيحات جۇمىستارىن جۇرگىزۋ قاجەت، - دەدى قاسىم-جومارت توقايەۆ.
ناۋرىزباي قاجى تاعان ۇلى مەملەكەت باسشىسىنا قازاقستان مۇسىلماندارى ءدىني باسقارماسىنىڭ الداعى اقپاراتتىق جانە ۇيىمداستىرۋشىلىق جۇمىستارى مەن قايىرىمدىلىق شارالارىنىڭ جوسپارىن تانىستىردى. باسقارما جۇمىسى يماندىلىق، وتانشىلدىق، بىلىمدىلىك، اۋىزبىرشىلىك، ەڭبەكقورلىق، مادەنيەتتىلىك جانە ادىلدىك سياقتى جەتى رۋحاني قازىققا نەگىزدەلمەك.
