جانكۇيەرلەر ديماشتى قازان اۋەجايىندا قوشەمەتپەن قارسى الدى

قازان. تاتار-ينفورم - قازاقپارات - وسى ۋاقىتتا تاتارستان استاناسى قازاندا ديماش قۇدايبەرگەننىڭ جەكە كونسەرتى وتۋدە، دەپ حابارلايدى قازاقپارات.

تاتار-ينفورم اگەنتتىگىنىڭ جازۋىنشا، قازان اۋەجايىندا ديماشتى ونداعان جانكۇيەر، ءتىپتى ەڭبەك ارداگەرى قارسى الىپ، ونىڭ قولىن الدى.

قازاقستاندىق ءارتىس تاتارستانعا اتا-اناسى سۆەتلانا جانە قانات ايتبايەۆتارمەن بىرگە كەلدى. جانكۇيەرلەر ولارعا دا ۇلكەن قوشەمەت كورسەتتى.

فاناتتار كەزدەسۋگە ۇلكەن دايىندىقپەن كەلگەن، ولاردىڭ قولدارىندا ۇلكەن ءبالىش، گۇلدەر، سىيلىقتار بولدى. سىيلىقتاردىڭ اراسىندا باشقۇرت حالقىنىڭ مۋزىكالىق اسپابى قۇراي دا بار. ولار قارا كوزىلدىرىك كيگەن ءانشىنى كورە سالا ەسىمىن داۋىستاپ ايعايلاپ: «تاتارستاندا ءسىزدى قاتتى توستىق. كەزەكتى رەت. ءسىزدى قاتتى جاقسى كورەمىز»، - دەپ جاتتى. د. قۇدايبەرگەن بولسا، وزىنە ءتان قاراپايىمدىلىقپەن جىلى قابىلداۋلارى ءۇشىن العىسىن ءبىلدىردى.

«ديماش اسىرەسە ارداگەرگە ەرەكشە كوڭىل اۋدارىپ، ونىمەن قول الىستى. فوتوعا ءتۇسۋ بارىسىندا ءىلتيپات ءبىلدىرىپ، قارا كوزىلدىرىگىن شەشتى. ايتا كەتەيىك، قارسى الۋشىلار اراسىندا تاتارستاننىڭ عانا تۇرعىندارى بولعان جوق. ولارمەن بىرگە كانادا، فينليانديا جانە قازاقستاننان «تۋعان» فاناتتار بولدى»، - دەلىنگەن اگەنتتىك اقپاراتىندا.

«بۇگىن ءبىز تاتارستانعا كەلدىك. «ارناۋ» اتتى كەزەكتى جەكە كونسەرتىم ساناۋلى مينۋتتاردان كەيىن باستالادى»، - دەپ جازعان بولاتىن ديماش Instagram-پاراقشاسىندا.

كونسەرت «تاتنەفت ارەنا» سپورت سارايىندا نۇر-سۇلتان ۋاقىتىمەن 23.00 دە باستالدى.

ايتا كەتەيىك، قازان قالاسى د. قۇدايبەرگەننىڭ «Arnau» اتتى الەمدىك گاسترولىندەگى ەكىنشى قالا. 16- اقپان كۇنى ول كراسنوداردا كونسەرت بەرگەن بولاتىن. بۇگىنگى شوۋدان كەيىن ءانشى ەكاتەرينبۋرگكە، ودان ءارى لاتۆيا، ۋكراينا، گەرمانيا، چەحياعا اتتانادى. تۋرنەنىڭ سوڭعى نۇكتەسى ءساۋىر ايىندا مينسك بولماق.