08:12, 21 - اقپان 2020 | GMT +6
قازاقستاندا جاندىك ولتىرەتىن ۋلى حيميكاتتاردى ساتۋعا تىيىم سالىندى
نۇر-سۇلتان. قازاقپارات - ەلىمىزدە جاندىكتەردى ولتىرۋگە ارنالعان ۋلى حيميكاتتاردىڭ ساتىلۋىنا شەكتەۋ قويىلدى، دەپ حابارلايدى قازاقپارات ق ر د س م تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتىنە سىلتەمە جاساپ.
«قازاقستان رەسپۋبليكاسىندا حالىقتىڭ سانيتارلىق-ەپيدەميولوگيالىق دەنساۋلىعىن قامتاماسىز ەتۋ ماقساتىندا دەزينسەكتسيالىق جانە دەراتيزاتسيالىق قىزمەتتە قولدانىلاتىن ۋىتتى زاتتارمەن ۋلانۋ فاكتىلەرىنىڭ تىركەلۋىنە بايلانىستى 2020-جىلدىڭ 20- اقپانىندا ق ر باس مەملەكەتتىك سانيتارلىق دارىگەرىنىڭ ورىنباسارى ن. ءسادۋاقاسوۆ «سانيتارلىق-پروفيلاكتيكالىق شارالاردى جۇرگىزۋ تۋرالى» قاۋلى شىعاردى»، دەلىنگەن كوميتەت حابارلاماسىندا.
وسىلايشا، بۇگىننەن باستاپ 1, 2, 3- سىنىپقا جاتاتىن قاۋىپتى دەزينسەكتسيا جانە دەراتيزاتسيا قۇرالدارىن ساتۋعا تىيىم سالىندى.
اتالعان ۋاقىتشا سانيتارلىق شارا ق ر زاڭناماسىنا ءتيىستى وزگەرىستەر ەنگىزىلگەنگە دەيىن ازاماتتاردىڭ دەنساۋلىعىنا جانە قورشاعان ورتانىڭ جاعدايىنا زيان كەلتىرۋ قاۋپىن تومەندەتۋگە مۇمكىندىك بەرەدى.