ۋحاندا بولدى ەكەن دەپ، ولاردى بوتەنسىتۋگە بولمايدى- ۋكراينا پرەزيدەنتى
بيلىكتىڭ رەسمي مالىمەتىنە سايكەس، ۇشاق بورتىنداعى ادامداردىڭ ەشبىرىندە اۋرۋ بەلگىلەرى انىقتالماعان. ەندى ۋحاننان ەۆاكۋاتسيالانعان ادامدار پولتاۆا وبلىسىنداعى ۇلتتىق گۆارديانىڭ مەديتسينالىق ورتالىعىندا 2 اپتا كارانتيندە بولادى. الايدا بۇعان جەرگىلىكتى تۇرعىندار قارسى. ولار كەشەدەن بەرى ەرەۋىلگە شىعىپ، نارازىلىق ءبىلدىرىپ جاتىر. اشۋعا بۋلىققان جۇرت جولدى جاۋىپ تاستاعان. ەرەۋىلگە شىققانداردىڭ ايتۋىنشا، ۋحاننان كەلگەندەردى قابىلدايتىن مەديتسينالىق ورتالىق ادامداردى وقشاۋلاۋعا ارنالماعان. بۇل جاعدايعا پرەزيدەنت ۆلاديمير زەلەنسكيي جاۋاپ بەردى.
ۆلاديمير زەلەنسكي، ۋكراينا پرەزيدەنتى:
- باكتەريولوگيالىق قاۋىپ جوق. ءتيىستى ساقتىق شارالارىنىڭ بارلىعى قابىلدانىپ قويعان. بىرنەشە ادام ۇشاققا مىنە المادى. ويتكەنى دەنە قىزۋى ءسال جوعارى بولعان. ءبىزدى تۇرعىنداردىڭ ەۆاكۋاتسياعا كەدەرگى كەلتىرۋى الاڭداتىپ وتىر. ۇشىپ كەلگەندەر اراسىندا ۋكراينالىقتاردىڭ بارىن ۇمىتپايىق. جولاۋشىلاردىڭ دەنى - جاسى ءالى 30-عا تولماعان ازاماتتار. ولار دا ءبىزدىڭ بالامىزداي. ۋحاندا بولدى ەكەن دەپ، ولاردى بوتەنسىتۋگە بولمايدى. فرانسيا قىتايدان ازاماتتارىن ەۆاكۋاتسيالاعان كەزدە تۇرعىندار ءوز وتانداستارىنىڭ جاعدايى ءۇشىن الاڭداپ، قولداۋ جاسادى. ءبىزدىڭ ۇشاق جانارماي قۇيۋ ءۇشىن قازاقستانعا ايالدادى ءارى قازاقستاندىق ازاماتتى جەتكىزدى. ول جاقتا دا ەشكىم قارسى شىعىپ، ەرەۋىل ۇيىمداستىرعان جوق.
زوريانا سكالەتسكايا، ۋكراينا دەنساۋلىق ساقتاۋ ءمينيسترى:
- ۋكراينا بيلىگى ءوز ازاماتتارىن قاۋىپتى جەردە قالدىرمايدى. ءبىز ۇكىمەتتىڭ جەدەل شتابى بەكىتكەن نۇسقاۋلارعا ساي ارەكەت ەتەمىز. بەكەر دۇربەلەڭ تۋدىرۋدىڭ قاجەتى جوق. ءبىز جەرگىلىكتى تۇرعىنداردىڭ قاۋىپسىزدىگىنە بەي- جاي قارامايمىز. حالىقارالىق ستاندارتتار مەن حالىقارالىق تاجىريبەگە ساي شارالار قابىلدانعان.
ال قىتايدىڭ وزىندە قاۋىپ قايتا كۇشەيدى. سوڭعى اقپار بويىنشا، كوروناۆيرۋستان ايىعىپ، ۇيىنە ورالعان ادامدار قايتا اۋرۋعا شالدىققان. عالىمدار مۇنى تەست تيىمدىلىگىنىڭ تومەندىگىمەن، زەرتحانا قىزمەتكەرلەرىنىڭ قاتەلىكتەرى جانە كەيبىر ناۋقاستاردىڭ اعزا ەرەكشەلىكتەرىمەن ءتۇسىندىردى. ەندى ماماندار ەمدەلىپ شىققان ادامداردى قوسىمشا 14 كۇندىك كارانتينگە جاتقىزۋ قاجەتتىگىن ايتادى.
قاۋىپتىڭ كۇشەيۋىنە بايلانىستى حاڭجوۋ پروۆينتسياسىنىڭ بيلىگى تەحنولوگيالىق الپاۋىت كومپانيالاردىڭ قولداۋىمەن جاڭا قوسىمشانى ىسكە قوستى. ول تۇرعىنداردىڭ كوروناۆيرۋستى جۇقتىرۋ دەرەكتەرىن باقىلاۋعا ارنالعان. ياعني ازاماتتار ونلاين ساۋالناما تولتىرادى. وسىدان كەيىن تەلەفوندارىنا دەنساۋلىق جاعدايىن بىلدىرەتىن ءتۇرلى- ءتۇستى QR- كود كەلەدى. قىزىل ءتۇستى كود كەلگەن جاعدايدا، تەلەفون يەسىنە 11 كۇن بويى كارانتيندە بولۋعا كەڭەس بەرىلەدى. سارى ءتۇستىسىن العاندار 7 كۇن ۇيدەن شىقپاۋى كەرەك. ال جاسىل كودى بار تۇرعىندار جۇرتپەن ەمىن- ەركىن ارالاسا الادى. قازىر بۇل كود تۇرعىن ءۇي كەشەندەرى مەن دۇكەندەرگە كىرەر كەزدە تالاپ ەتىلەدى.
جاڭ بو، اۋداندىق پارتيا كوميتەتىنىڭ وكىلى:
- QR- كود كودتار ءبىراز شارۋانى جەڭىلدەتىپ وتىر. ياعني قوسىمشانىڭ كومەگىمەن عيماراتقا ادامداردىڭ كىرىپ- شىعۋى كەزىندە تۋىندايتىن قيىندىقتار ازايدى.
وسى ۆيرۋسقا بايلانىستى داۋ دا كوپ. قىتاي امەريكالىق The Wall Street Journal باسىلىمىنىڭ ءۇش جۋرناليسىن اككرەديتاتسياسىنان ايىردى. وعان گازەت تىلشىلەرىنىڭ اقپاننىڭ 3- كۇنى «قىتاي - شىنىمەن ازياداعى اۋرۋ ادام» اتتى ماقالا جاريالاۋى سەبەپ. بەيجىڭ كوروناۆيرۋسقا ارنالعان بۇل ماقالانى ناسىلدىك كەمسىتۋشىلىك دەپ كورسەتىپ، قوعامدا نارازىلىق تۋعىزعانىن مالىمدەدى. سەبەبى «ازيانىڭ اۋرۋ ادامى» دەپ 19-عاسىردىڭ اياق كەزىندە قىتايدىڭ وزگە ەلدەرمەن ءماجبۇرلى كەلىسىمشارتتارعا قول قويۋىن اتاعان.
جالپى بۇعان دەيىن ا ق ش تاراپى دا 5 بىردەي قىتايلىق بۇقارالىق اقپارات قۇرالى ءۇشىن ءبىرقاتار شەكتەۋ ەنگىزگەن. ماسەلەن، ەندى ولارعا امەريكالىقتاردىڭ ارنايى رۇقساتىنسىز جاڭا قىزمەتكەرلەردى جۇمىسقا قابىلداۋعا نە مۇلىك ساتىپ الۋعا بولمايدى. قىتاي جاعى دا قاراپ قالعان جوق. جاۋاپ رەتىندە ءتيىستى شارالار قابىلدانۋى مۇمكىن ەكەنىن ەسكەرتكەن.
www.24.kz