شىعىستاعى شەكارادان باسقا ەلدىڭ ازاماتتارى وتپەيدى
ءسويتىپ، قاس قارايعاندا جۇرت كوشەگە شىعىپ، نارازىلىقتارىن بىلدىرگەن. بۇگىن اۋدانعا وبلىس اكىمى ارنايى بارىپ، جۇرتتى سابىرعا شاقىردى. دانيال احمەتوۆ وزگە ەلدىڭ ازاماتتارى شەكارادان بەيساۋات وتپەيتىنىن كەسىپ ايتتى. سونىمەن شىعىستاعى شەكارادا قازىر جاعداي قالاي ەكەن؟
وتكەن ءتۇنى زايسان اۋدانىنا قاراستى سارى تەرەك، اينابۇلاق اۋىلدارىنىڭ تۇرعىندارى وسىلايشا نارازىلىقتارىن ءبىلدىردى. جۇرت مايقاپشاعاي شەكارا بەكەتى ارقىلى قىتايدان بەرى قاراي وتكەندەردىڭ ءبارىن اتالعان ەلدى مەكەندەرگە اكەلۋگە قارسى. بۇل اقپارات الەۋمەتتىك جەلىلەردە تارادى. بىردەن- بىرگە جەتكەن قاڭقۋ ءسوزدىڭ شىن- وتىرىگىنە كوپشىلىك بويلاي قويماعان. اقىرى كوشەگە شىقتى. اقپاننىڭ جيىرماسى. نارازىلىق زايساننىڭ وزىندە دە جالعاستى. تۇرعىندار وبلىس اكىمىنەن شەكارا بەكەتىن جابۋدى تالاپ ەتتى. حالىقتىڭ تالابىن تىڭداعان دانيال احمەتوۆ شەكارادان وزگە ەلدىڭ ازاماتتارى بەيساۋات وتپەيتىنىن جەتكىزدى.
دانيال احمەتوۆ، وبلىس اكىمى:
- بىرىنشىدەن، قازىر شەكارادان باسقا ەلدىڭ ازاماتتارى وتپەيدى. تەك قانا قازاقستاندىقتار وتەدى. ويتكەنى ولار ءبىزدىڭ قانىمىز. ال وزگە ەلدىڭ ازاماتتارى وتپەيدى.
وبلىس اكىمىنىڭ سوزىنەن سوڭ حالىقتىڭ تولقىنىسى، قورقىنىشى باسىلعان. ىلە- شالا اۋىلدىق وكرۋگتىڭ اكىمى مەن بەكەت باسشىلىعى مالىمدەمە جاسادى. مايقاپشاعاي شەكارا بەكەتىنەن بەرى قاراي قىتايدىڭ بىردە- ءبىر ازاماتى وتكىزىلمەگەن. ەكى ەل اراسىندا اۆتوبۋس قاتىناسى دا توقتاتىلدى.
الماس چۋكەشوۆ، باقتى اۋىلدىق وكرۋگىنىڭ اكىمى:
- قازىرگى تاڭدا اۋىل حالقىندا ەشقانداي تۇسىنىسپەۋشىلىك فاكتىلەرى تىركەلگەن جوق. اۋىل حالقى قازىر تىنىش. وسىنداي اتقارىلىپ جاتقان شارالاراعا تۇسىنىستىكپەن قاراۋدا.
قۋانىش جاقسىبەك ۇلى مايقاپشاعاي، باقىلاۋ- وتكىزۋ بەكەتىنىڭ باسشىسى:
- «مايقاپشاعاي» وتكىزۋ بەكەتى قازاقستان رەسپۋبليكاسى مەن قىتاي حالىق رەسپۋبليكاسى اراسىنداعى كەلىسىم بويىنشا قالىپتى جاعدايدا جۇمىس ىستەپ جاتىر. 2020 -جىلدىڭ 1- ءى مەن 20 - اقپان ارالىعىندا 102 ادام وتكىزىلدى. ونىڭ 40-ى - قازاقستان ازاماتى. قازاقستان اۋماعىنان كەتكەن 62 ادام. بارلىق كىرگىزىلگەندەر قازاقستان ازاماتتارى. قىتايدان كىرگەن قىتاي ازاماتتارى جوق.
شەكارادان ءارى- بەرى وتەتىندەر نەگىزىنەن ساۋدامەن اينالىساتىن، جۇك كولىكتەرىن جۇرگىزەتىن قازاقستاندىقتار. اقپاننىڭ جيىرماسىندا باس سانيتارلىق دارىگەردىڭ كارانتين تۋرالى جاڭا ەرەجەسى كۇشىنە ەنگەندىكتەن، زايساندا شەكارادان وتكەن ءوزىمىزدىڭ ازاماتتاردى تەكسەرۋ ءۇشىن ارنايى ورىندار ازىرلەنەتىنى ايتىلعان. سوندىقتان تەك وتانداستارىمىز عانا ەلگە كىرگىزىلەدى. اتالعان بەكەتتەردەن وزگە ازاماتتار وتە المايتىنىن ەسكەرگەنىمىز ءجون.
www.24.kz