عالىمدار لاتىن نەگىزدى قازاق الىپبيىنە قانداي تالاپ قويىپ وتىر؟

None
None
نۇر-سۇلتان. قازاقپارات – ق ر پرەزيدەنتى قاسىم-جومارت توقايەۆتىڭ ءالىپبيدى جەتىلدىرۋگە بايلانىستى تاپسىرماسىنا وراي بۇگىن ق ر مادەنيەت جانە سپورت مينيسترلىگىنىڭ ۇيىمداستىرۋىمەن الماتىدا «لاتىن نەگىزدى قازاق ءالىپبيى: ۇسىنىستار، تالقى جانە ناتيجە» اتتى كەڭەس ءوتتى، دەپ حابارلايدى قازاقپارات ءتىلشىسى.

اتالعان ۆەدومستۆونىڭ باسپا ءسوز قىزمەتى تاراتقان اقپاراتقا سايكەس، جۇمىس توپتارىنىڭ بىرلەسكەن كەڭەسىندە ءۇش ءالىپبي جوباسى تالقىلاندى. ولار: بۇعان دەيىن بەكىتىلگەن الايدا جەتىلدىرىلۋ قاجەتتىگى تۋىنداعان اكۋت نۇسقاسى، بالامالى نەگىزدەگى ۋملاۋتتى ءالىپبي جوباسى جانە ا. بايتۇرسىن ۇلى اتىنداعى ءتىل ءبىلىمى ينستيتۋتى عالىمدار توبىنىڭ ءالىپبي جوباسى. العاشقى ەكى ءالىپبي جوباسى 14- اقپاندا ءتىل كوميتەتىنىڭ ۇيىمداستىرۋمەن جانە ايماقتاعى ءتىل باسقارمالارىنىڭ ۇيلەستىرۋىمەن رەسپۋبليكالىق كولەمدە فيلولوگ عالىمدار مەن ادىسكەرلەر، جوعارى جانە ورتا ءبىلىم بەرەتىن وقۋ ورىندارىنىڭ ءتىل ماماندارى اراسىندا اشىق تالقىلاۋدان ءوتتى. ءۇشىنشى جوبا الەۋمەتتىك جەلىلەردە تالقىلاندى. اتالعان ءالىپبي جوبالارىنىڭ قايسىسى قولدانۋعا ءتيىمدى ەكەنىن انىقتاۋ ماقساتىندا ق ر ءبىلىم جانە عىلىم مينيسترلىگىندە وقۋشىلار مەن ستۋدەنتەر اراسىندا ءالىپبي جوبالارى بويىنشا سىناما-ساۋالناما جۇمىستارى جۇرگىزىلدى. سونداي-اق، ق ر سيفرلىق دامۋ، يننوۆاتسيا جانە اەروعارىش ونەركاسىبى مينيسترىلىگى UNICODE- قا سايكەستىگىن، بانكتەر بانك جۇيەسىندە قولدانىسقا ىڭعايلىلىعى، «نۇر وتان» جاستار قاناتىندا ءالىپبي جوبالارى بويىنشا سىناما-سەمينارلار، ساراپتاۋ جۇمىستارى جاسالىپ، ب ا ق- تا ءالىپبيدى جەتىلدىرۋگە بايلانىستى 90 عا جۋىق ماقالا جارىق كوردى.

كەڭەيتىلگەن كەڭەستە وسى تالداۋلار مەن تالقىلاۋلاردىڭ قورىتىندىلارى، ۇسىنىستار جانە سىناما جۇمىستارىنىڭ ناتيجەلەرى، ساراپتامالارى جيناقتالىپ باياندالدى. عالىمدار الىپبيگە مىناداي تالاپتار قويىپ وتىر: قازاق ءتىلىنىڭ بارلىق دىبىستارىنىڭ قامتىلۋى؛ «ءبىر دىبىس - ءبىر تاڭبا» قاعيداتىنىڭ ساقتالۋى؛ قوسىمشا دياكريتيكالىق بەلگىلەردىڭ ساباقتاستىعى مەن جۇيەلىلىگى؛ لاتىن تاڭبالارىنىڭ جانە دياكريتيكالاردىڭ قازاق ءتىلىنىڭ دىبىستارى سيپاتىنا ساي بولۋى؛ الىپبيدە عىلىمي نەگىزدىلىكتىڭ ساقتالۋى؛ ءالىپبي تاڭبالارىنىڭ حالىقارالىق فونەتيكالىق ءالىپبي جۇيەسىنە سايكەستىگى؛ ءالىپبي تاڭبالارىنىڭ UNICODE جۇيەسىنە ساي بولۋى؛ قازاق ءتىلىنىڭ ءتول تابيعاتىنا ساي الىپبيلىك رەتتىلىكتىڭ ساقتالۋى.

بىرلەسكەن كەڭەستە ءالىپبيدىڭ ءۇش جوباسى بويىنشا ارنايى باياندامالار جاسالىپ، عىلىمي تالقىلاۋ وتكىزىلدى. تالقىلانعان جوبالار اراسىنان لايىقتى دەپ تانىلعان ءالىپبي جوباسى ۇلتتىق كوميسسياعا ۇسىنىلاتىن بولادى.

جيىنعا مادەنيەت جانە سپورت ۆيتسە-ءمينيسترى ن. داۋەشوۆ، ءبىلىم جانە عىلىم، اقپارات جانە قوعامدىق دامۋ، سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىكتەرى جانە ءتىل ساياساتى كوميتەتى وكىلدەرى مەن ۇلتتىق كوميسسيا جانىنداعى ورفوگرافيالىق، ادىستەمەلىك، تەرمينولوگيالىق، ساراپتاما جانە تەحنيكالىق جۇمىس توپتارىنىڭ مۇشەلەرى بولىپ تابىلاتىن عالىمدار قاتىستى.

سوڭعى جاڭالىقتار