09:15, 20 - اقپان 2020 | GMT +6
يراندا كوروناۆيرۋستان ەكى ادام اجال قۇشتى
تەگەران. يرنا- قازاقپارات - يراندا كوروناۆيرۋس جۇقتىرعان ەكى ادام قايتىس بولدى. بۇل تۋرالى يير دەنساۋلىق ساقتاۋ ءمينيسترىنىڭ كەڭەسشىسى كيانۋش دجاحانپۋر ءمالىم ەتتى، دەپ حابارلايدى قازاقپارات يرنا- عا سىلتەمە جاساپ.
«وكىنىشكە قاراي، كوروناۆيرۋس انىقتالعان ەگدە جاستاعى ەكى ادام جان تاپسىردى» دەپ حابارلادى دجاحانپۋر.
بۇعان دەيىن يراننىڭ دەنساۋلىق ساقتاۋ ءمينيسترى ەكى ادامنىڭ كوروناۆيرۋس جۇقتىرعانىن راستاعان بولاتىن.
بۇل اقپاراتتى يراندىق ۇكىمەت وكىلى الي رابي دە راستادى.
«بىرنەشە مينۋت بۇرىن دەنساۋلىق ساقتاۋ ءمينيسترى مەكەمە ماماندارىنىڭ بايانداماسىنا سۇيەنە وتىرىپ، كۋمدا كوروناۆيرۋس جۇقتىردى دەگەن كۇدىگى بار ەكى ادامنىڭ ساراپتاماسى وڭ ناتيجە كورسەتكەنىن ءمالىم ەتتى» ، - دەپ جازدى ول Twitter پاراقشاسىندا.
بۇل يرانداعى العاشقى كوروناۆيرۋس جۇقتىرۋ وقيعالارى.
ەكى ادام قازا تاپقان كۋمدا بەيسەنبى كۇنى مەكتەپتەردەگى ساباق توقتاتىلدى.