ۇيقى قانباۋدىڭ قاۋىپتىلىگى ايتىلدى

نۇر-سۇلتان. قازاقپارات - عالىمدار ۇيقى قانباۋ، سەمىزدىك، ديابەت جانە جۇرەك اۋرۋلارىنىڭ ارتى قانداي قيىنشىلىقتارعا اكەپ سوعۋى مۇمكىن ەكەندىگىن ايتىپ كەتتى.

رەسەيدىڭ جوعارى جۇيكە جۇمىسى مەن نەيروفيزيولوگيا ينستيتۋتىنا قاراستى ءتۇس كورۋ نەيروبيولوگيا زەرتحاناسىنىڭ جەتەكشىسى ۆلاديمير دوروحوۆتىڭ ايتۋىنشا، كەيبىر ادامنىڭ بويىندا ۇيقى گەنى بولادى ەكەن. بۇل گەنى بار ادامدار ءتورت ساعات قانا ۇيىقتاپ، سەرگەك بولىپ جۇرە الادى.

مامان جۇمىس ۋاقىتىن ۇزارتۋ ءۇشىن كوپ ۇيىقتاۋ دۇرىس ەمەس ەكەندىگىن اتاپ ءوتتى. بۇعان قوسا ول ۇيقى قانباعاندىق اعزاعا كەرى ىقپالىن تيگىزۋى مۇمكىن.

«تۇندە ۇيىقتاۋ وتە ماڭىزدى. سەبەبى ۇيىقتاعان كەزدە ءسىزدىڭ دەنەڭىز ءوزىن قالىپقا كەلتىرەدى. ال ەگەر ۇيقى جەتپەسە، ول ءتۇرلى پاتولوگيالىق اۋىتقۋشىلىققا اكەلۋى مۇمكىن»، - دەدى زەرتحانا جەتەكشىسى.

سونىمەن قاتار دوروحوۆ پايدالى ۇيقى گەنى بولعان تۇلعالاردىڭ قاتارىنا مارگارەت تەتچەر، ناپولەون بوناپارت، الەكساندر ماكەدونسكي مەن ۋينستون چەرچيلدىڭ جاتقىزدى.

«ولار ءتورت ساعات قانا ۇيىقتاپ، وزدەرىنىڭ جۇمىستارىن جۇرگىزە بەرگەن. ءبىراق بۇل بارلىعىنا بەرىلگەن قاسيەت ەمەس»، - دەپ قوستى رەسەيلىك مامان.

ەسكە سالايىق، بۇعان دەيىن كۇندىزگى ۋاقىتتا شامادان تىس ۇيىقتاۋدىڭ دا زيانى بار ەكەندىگى ايتىلعان ەدى.