سويا مەن جۇگەرىنى قىتايعا ەكسپورتتاۋىمىز كەرەك - دانيال احمەتوۆ

وسكەمەن. قازاقپارات - شىعىس قازاقستان وبلىسىنىڭ اكىمى دانيال احمەتوۆ سويا مەن جۇگەرىنى قىتايعا ەكسپورتتاۋ كەرەكتىگىن ايتتى، دەپ حابارلايدى قازاقپارات.

«وڭىرىمىزدە اگروونەركاسىپتىك كەشەندى دامىتۋدىڭ باستى باعىتى - وسىمدىك شارۋاشىلىعى ونىمدەرىن ەكسپورتقا شىعارۋ. بۇل ءبىرىنشى كەزەكتە سويا مەن جۇگەرىگە قاتىستى. 2024 -جىلعا قاراي ونىڭ ەگىس القابى 4,2 ەسە ءوسىپ، ەكسپورت كولەمى 1,5 مىڭنان 15 مىڭ تونناعا دەيىن، ياعني 10 ەسە ارتادى» ، - دەدى ايماق باسشىسى تۇرعىندار الدىنداعى ەسەپ بەرۋ كەزدەسۋىندە.

ونىڭ ايتۋىنشا، شىعىس قازاقستان ءسۇت، بال، مارالدىڭ ءمۇيىزى، كۇنباعىس مايى ءوندىرىسى بويىنشا رەسپۋبليكادا - ءبىرىنشى، ەت وندىرۋدە - ەكىنشى ورىندا تۇر.

«سوڭعى 5 جىلدا ءسۇتتى مال شارۋاشىلىعىن دامىتۋ باعدارلاماسى اياسىندا قۇيىلعان ينۆەستيتسيا تۇرعىنداردان ءسۇت ساتىپ الۋ كورسەتكىشىن 17 ەسە ارتتىرۋعا مۇمكىندىك بەردى. ناتيجەسىندە وڭدەۋشى كاسىپورىنداردىڭ قۋاتى 29 دان 75 پايىزعا دەيىن ءوستى» ، - دەدى دانيال كەنجەتاي ۇلى.