19:06, 19 - اقپان 2020 | GMT +6
ۋحاندا ارنايى سالىنعان اۋرۋحانانىڭ باس دارىگەرى كوز جۇمدى
نۇر-سۇلتان. قازاقپارات - قىتايدىڭ ۋحان قالاسىندا كوروناۆيرۋستى جۇقتىرعانداردى ەمدەۋ ءۇشىن ارنايى سالىنعان اۋرۋحانانىڭ باس دارىگەرى وسى ىندەتتەن كوز جۇمدى، دەپ حابارلايدى «حابار 24».
بۇعان دەيىن اسپان استى ەلىندە COVID-19 ۆيرۋسىنان بىردە ءبىر مەديتسينالىق مەكەمە باسشىسى مەرت بولعان ەمەس.
شامامەن ەكى اپتا بۇرىن ەپيدەميا باستالماي تۇرىپ، ىندەتتىڭ قاۋپى جايلى ەسكەرتكەن دارىگەر دە كوروناۆيرۋستان اجال قۇشقان ەدى. ول بىلتىر جەلتوقساندا اۋرۋدىڭ العاشقى دەرەكتەرى جايلى دوستارىنا ايتىپ، مەسسەندجەردە حابارلاما تاراتقان. الايدا ارتىنشا وفتالمولوگتى پوليتسياعا شاقىرتىپ، جالعان اقپارات تاراتۋعا تىيىم سالعان بولاتىن. جالپى سوڭعى مالىمەت بويىنشا، قىتايدا كوروناۆيرۋستى جۇقتىرعاندار سانى 72 مىڭنان اسادى. سولاردىڭ 1700-دەن استامى - مەديتسينالىق قىزمەتكەرلەر.