+7 (701) 759 90 19
-1 °С : نۇر-سۇلتان
4 °С : الماتى
USD 443.50 EUR 479.47
RUB 5.79 CNY 62.51
جاڭالىقتار

اماندىق باتالوۆ حالىققا ەسەبىنەن سوڭ تالدىقورعان اكىمىنىڭ ورىنباسارىن جۇمىستان شىعاردى

19 اقپان 18:31
:ءبولىسۋ
اماندىق باتالوۆ حالىققا ەسەبىنەن سوڭ تالدىقورعان اكىمىنىڭ ورىنباسارىن جۇمىستان شىعاردى

تالدىقورعان. قازاقپارات - الماتى وبلىسىنىڭ اكىمى اماندىق باتالوۆ تالدىقورعان قالاسى اكىمىنىڭ ورىنباسارى اسحات قالياسقاروۆتى «دەماگوگ» دەپ اتاپ، جۇمىستان شىعاردى، دەپ حابارلايدى قازاقپارات ءتىلشىسى.

بۇل جاعداي ءوڭىر باسشىسىنىڭ حالىق الدىنداعى ەسەبى اياقتالعاننان كەيىن بولدى. ەسەپتىك جيىن اياقتالۋعا جاقىن قالعاندا تالدىقورعان قالاسىنىڭ تۇرعىنى لياززات قۇدايبەرگەن ءوزىنىڭ شاعىمىن تىڭداۋدى وبلىس اكىمىنەن سۇرادى. اماندىق باتالوۆ جيىننان سوڭ ءتورت بالاسى بار جالعىز باستى انانى تىڭداۋعا ۋادە بەرگەن ەدى. زالدىڭ شىعا بەرىسىندە اكىمدى كۇتكەن لياززات اماندىق باتالوۆقا بولعان جايتتى بايانداپ بەردى.

«مەن سىزگە قاراشا ايىندا جولىققان بولاتىنمىن. ءسىز قالا اكىمىنىڭ ورىنباسارى اسحات مەيرامعالي ۇلىنا تاپسىرما بەردىڭىز. ءبىراق وسى ۋاقىتقا دەيىن ەشقانداي ماسەلەم شەشىلگەن جوق. 21 جىلدان استام ۋاقىتتان بەرى اتا- انامنان قالعان پاتەرىمنىڭ قۇجاتتارىن راسىمدەي الماي ءجۇرمىن. مەن كوپبالالى انامىن، جالعىز باستى. قايدا بارامىن ەندى، بىلمەيمىن»، - دەدى لياززات قۇدايبەرگەن.

ال الماتى وبلىسىنىڭ اكىمى اماندىق باتالوۆ كوپبالالى انادان ماسەلەسىنىڭ نە سەبەپتى شەشىلمەگەنىن سۇرادى.

«اماندىق باتالوۆقا كىرسەڭىز بولدى، ماسەلە شەشىلەدى دەپ ويلايسىز با؟»، - دەدى ماعان اسحات مەيرامعالي ۇلى. «پالەنباي ميلليون حالىق بار، بارىنە كومەكتەسە بەرسەم نەم قالادى، اقشاڭدى شىعار دا ءوزىڭ جاسا» دەدى. ەگەر مەنىڭ اقشام بار بولسا، مەن ونداي كومەك سۇراماس ەدىم. مەن سىزدەن تۇرعىن- ءۇي، قاراجات سۇراپ تۇرعان جوقپىن. اكە- شەشەمنەن قالعان ءوز ءۇيىمنىڭ قۇجاتتارىن راسىمدەي الماي تۇرمىن. بازادا ول ءۇي جوق. ۇكىمەتكە وتپەگەن. قۇرىلىس بولىپ، تاپسىرىلماعان. سول كۇيى اركىم ءوز بەتىنشە كىرىپ العان. مەن ول جەردە تىركەۋدە تۇرمىن»، - دەدى ءلاززات قۇدايبەرگەن ءوڭىر باسشىسىنا.

اماندىق باتالوۆ بىردەن تالدىقورعان قالاسى اكىمىنىڭ ورىنباسارى اسحات قالياسقاروۆتى شاقىرىپ، بەرىلگەن تاپسىرمانى نە سەبەپتى ورىنداماعانىن سۇرادى.

«ەگەر باياعىدان بەرگى وسىنداي ۋاقىتى وتكەن جاعداي بولاتىن بولسا، كوميسسيا قۇرىپ، ونىڭ قۇرامىنا دەپۋتات، «نۇر- وتان» پارتياسىنىڭ وكىلدەرىن قوسىپ، قاراپ، شەشىم شىعارۋ كەرەك»، - دەدى اماندىق باتالوۆ.

تاپسىرمانى دەر كەزىندە ورىنداماعان شەنەۋنىكتىڭ ارەكەتىنە اشۋلانعان اماندىق باتالوۆ ونىڭ ارىز جازىپ، جۇمىستان كەتۋىن سۇرادى.

«ماعان «دەماگوگ» كەرەك ەمەس. ارىزىڭدى جاز دا، بار»، - دەدى اماندىق باتالوۆ تالدىقورعان قالاسى اكىمىنىڭ ورىنباسارى اسحات قالياسقاروۆقا.

وبلىس اكىمى تالدىقورعان قالاسىنىڭ اكىمى عالىمجان ءابدىرايىموۆقا اسحات قالياسقاروۆتىڭ ورنىنا ىسكەر ورىنباسار تابۋدى تالاپ ەتتى.

«مەن كەشە بايقاعانمىن. حالىق ماعان كەلگەندە، ول ءجوندى (رەد: تالدىقورعان قالاسى اكىمىنىڭ ورىنباسارى اسحات قالياسقاروۆ) جاۋاپ تا بەرە العان جوق. مۇنداي ادامدى «دەماگوگ» دەپ اتايدى. دەماگوگ كەرەك ەمەس. ارىزىن جازسىن. سودان كەيىن مىنا كىسىنىڭ ماسەلەسىن شەشىپ بەرىڭدەر»، - دەگەن اماندىق باتالوۆ تالدىقورعان قالاسىنىڭ اكىمى عالىمجان ءابدىرايىموۆقا ماسەلەنى شەشۋدى تاپسىردى.

وسى وقيعاعا بايلانىستى اكىمدىك تۇسىنىكتەمە بەردى. «مەملەكەتتىك قىزمەتتىڭ ابىرويىن تۇسىرگەنى جانە تۇرعىندار تاراپىنان كەلگەن ارىز- شاعىمداردى ءوز دەڭگەيىندە قاراماعانى ءۇشىن تالدىقورعان قالاسى اكىمىنىڭ ورىنباسارى اسحات قالياسقاروۆتى جۇمىستان شىعارۋعا وبلىس اكىمى تاراپىنان بۇيرىق بەرىلدى»، - دەدى الماتى وبلىسى اكىمىنىڭ باسپا ءسوز قىزمەتىنىڭ جەتەكشىسى عالىمۇرات جۇكەل.

اۆتور: سامال قابىشيەۆا



باستى سوزدەر: ايماق,
:ءبولىسۋ
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
باقىتجول كاكەش
باقىتجول كاكەش
954-049
رەداكتور
ريزابەك نۇسىپبەك
ريزابەك نۇسىپبەك
954-049
رەداكتور
بەيسەن سۇلتان
بەيسەن سۇلتان
954-049

مۇراعات