ساعىنتايەۆ كوروناۆيرۋس تۋرالى: بەتپەردەگە قوسىمشا تاپسىرىس بەرۋگە تۋرا كەلدى

الماتى. قازاقپارات - الماتى اكىمى باقىتجان ساعىنتايەۆ حالىقپەن ەسەپتى كەزدەسۋىندە كوروناۆيرۋسپەن كۇرەس جۇرگىزۋدە قانداي شارالار قولعا الىنىپ جاتقانىن ايتتى، دەپ حابارلايدى قازاقپارات ءتىلشىسى.

اكىمنىڭ ايتۋىنشا، وسى باعىتتا شۇعىل تۇردە قالا اكىمىنىڭ ورىنباسارى ەرجان باباقۇماروۆتىڭ باسشىلىعىمەن ارنايى شتاب قۇرىلعان.

«بارلىق قالا قىزمەتتەرى ىسكە قوسىلدى. ب ا ق- تىڭ قاتىسۋىمەن بىرنەشە وقۋ- جاتتىعۋ جۇمىستارىن جۇرگىزدىك. جولاۋشىلاردى ۇشاقتان ءتۇسىرىپ الىپ، كۇتۋ زالىنا دەيىن اپاردىق. بارلىق جەردە ءدارى دارمەك پەن پالاتالار جابدىقتالدى. باسىندا حالىق اراسىندا حانتالاپاي باستالدى. بەتپەردەلەردى تۇگەل ساتىپ الىپ كەتتى. قوسىمشا تاپسىرىس بەرۋگە تۋرا كەلدى. ءقازىر قالادا بەتپەردەلەر جەتكىلىكتى. بارلىق قىتايدان كەلگەن ازاماتتاردى اتى- جونىمەن تەكسەردىك. باقىتىمىزعا قاراي، كوروناۆيرۋس ەشقايسىسىندا جوق»، - دەدى اكىم.

ايتا كەتەيىك، الماتىدا باقىتجان ساعىنتايەۆتىڭ ەسەپتى كەزدەسۋى ءوتىپ جاتىر.