قازاقستان قورجىنىنا توكيو وليمپياداسىنىڭ تاعى ءبىر جولداماسى ءتۇستى
ق ر ۇلتتىق وليمپيادالىق كوميتەت حابارلاعانداي، 67 كەلىگە دەيىنگى بىرىككەن سالماق دارەجەسىندە سىنعا تۇسەتىن دارحان وليمپيادا ويىندارىنا مەرزىمىنەن بۇرىن ليتسەنزيا ۇتىپ الدى.
«ءتورتجىلدىق دوداسىنا ىرىكتەۋ كەزەڭىنىڭ اياقتالۋىنا ءالى ءۇش ايداي ۋاقىت پەن بىرنەشە ءىرى جارىستىڭ بارىنا قاراماستان، د. ءاسادىلوۆ توكيو وليمپياداسىنا قاتىسۋ مۇمكىندىگىن يەلەنىپ وتىر. سەبەبى، وليمپيادالىق رەيتينگتىڭ كوش باسىندا كەلە جاتقان دارحاندى جاقىن ارادا ەشكىم قۋىپ جەتە المايدى. بۇل تۋرالى دۋبايدا وتكەن فينالدىق كەزەڭنەن كەيىن بەلگىلى بولدى»، - دەلىنگەن حابارلامادا.
ىرىكتەۋ كەزەڭىنىڭ ەرەجەسىنە سايكەس، رەيتينگتە العاشقى ەكى ورىندى يەلەنگەن سپورتشىلار تىكەلەي توكيو وليمپياداسىنا ليتسەنزيا الادى. دارحان ءاسادىلوۆ وتكەن جىلى باستالعان ىرىكتەۋ باسەكەلەرىنىڭ باسىم كوپشىلىگىندە جەڭىسكە جەتكەن.
اتاپ ايتار بولساق، قازاقستان كومانداسىنىڭ ۇزدىگى 11 پرەمەر-ليگا كەزەڭىنىڭ سەگىزىندە جەڭىسكە جەتكەن. وسىلايشا، ول جۇزدەن اسا ەلدەن قاتىسقان 600 سپورتشىنىڭ ىشىنەن كوش باستاپ وتىر.
ءاسادىلوۆ 67 كەلىگە دەيىنگى بىرىككەن سالماق دارەجەسىندەگى وليمپيادالىق رەيتينگ تىزگىنىن وتكەن جىلدىڭ شىلدەسىنەن بەرى ەشكىمگە ۇستاتپاعان. قازىرگى ساتتە دارحاننىڭ ەنشىسىندە 9817.5 ۇپاي بار.
ال ونىڭ ءىزىن باسىپ كەلە جاتقان يتاليالىق اندجەلو كرەچەنزودا - 7350، تۇركيالىق سامدان ەرايدا 6772.5 ۇپاي بار.
ىرىكتەۋ كەزەڭىندەگى قالعان تۋرنيرلەر دارحان ءۇشىن ءساتسىز اياقتالعاننىڭ وزىندە، قارسىلاستاردىڭ قۋىپ جەتۋى نەعايبىل. ويتكەنى، ءاسادىلوۆ باستى قارسىلاستارىنان قارا ءۇزىپ كەتكەن.
كاراتەنىڭ وليمپيادا باعدارلاماسىنا العاش رەت ەنگىزىلىپ وتىرعانىن ەسكەرسەك، دارحاننىڭ بۇل جەتىستىگى تاريحتا قالاتىنى ءسوزسىز.
ايتا كەتەلىك، ازىرگە قازاقستان قورجىنىندا سپورتتىڭ 15 تۇرىنەن 29 جولداما بار.
اۆتور: كۇنسۇلتان وتارباي