ديماش قۇدايبەرگەن: كورەرمەندى الداۋعا نەمەسە شپور پايدالانۋعا بولمايدى
«مەن ءار كونسەرتىمدە كورەرمەن الدىندا ەمتيحان تاپسىرعانداي بولامىن. وندا كورەرمەندى الداۋعا نەمەسە شپور پايدالانۋعا بولمايدى» دەپ ازىلدەدى ديماش قۇدايبەرگەن ماسكەۋ قالاسىندا وتكەن باسپا ءسوز ءماسليحاتىندا.
وعان ءانشىنىڭ اكەسى قانات ايتبايەۆ پەن رەسەيلىك تانىمال كومپوزيتور يگور كرۋتوي قاتىستى.
9- ناۋرىز كۇنى رەسەي استاناسىندا وتەتىن ديماشتىڭ كونسەرتىنە ارنالعان جۋرناليستەرمەن بەيرەسمي باسقوسۋدى يگور كرۋتوي اشتى.
ول قازاقستاندىق ءانشىنىڭ كەشى ءساتتى ۇيىمداستىرىلاتىنىنا كۇمان كەلتىرمەيتىنىن ايتىپ، بۇدان بۇرىنعى كونسەرتتەردى ەسكە ءتۇسىردى. ماسكەۋدە وتەتىن كونسەرتتىڭ ءمان-جايى تۋرالى ديماشتىڭ ءوزى ايتىپ بەردى.
«باعدارلامانى «ارناۋ» دەپ اتادىق. ءبىز باسقا ەلدەردە، سونىڭ ىشىندە ا ق ش- تا بىرنەشە كونسەرت قويدىق، قازىر ماسكەۋدە اسەرلى كەش وتكىزۋگە دايىندىق ۇستىندەمىز»، - دەدى ول.
قازاقستاندىق ءانشى ءوز كونسەرتتەرىنىڭ ءارقايسىسى ءبىر «ەمتيحان» ەكەنىن ايتىپ ازىلدەدى. وندا كورەرمەندى الداۋعا نەمەسە شپور پايدالانۋعا بولمايدى. ديماش يگور كرۋتويعا ريزاشىلىعىن دا جەتكىزىپ، بالا كەزىنەن باستاپ رەسەيلىك كومپوزيتورمەن جۇمىس ىستەۋدى ارمانداعانىن اڭگىمەلەدى.
رەسەيلىك كومپوزيتور «ديماش قۇبىلىسى» دەگەن ۇعىمنىڭ ءمان-ماڭىزىنا توقتالدى.
«ديماشتىڭ ەرەكشە داۋىسى، قايتالانباس ىرعاعى بار. ونىڭ مۋزىكانى ءوزى ارقىلى وتكىزۋى وتە ماڭىزدى. ويتكەنى، ول كەرەمەت دارىنعا يە. ال مەن ونىڭ ساۋاتتى جانكۇيەرىمىن! سەبەبى، قانشا تىرىسسام دا، وعان ۇقساي المايتىنىما انىق كوزىم جەتەدى. ونىڭ تالانتى بيىك»، - دەدى ي. كرۋتوي.
ديماشتىڭ اكەسى قانات ايتبايەۆ الدا وتەتىن ديماشتىڭ كونسەرتىندە كورەرمەن كوپتەگەن جاڭالىقتار مەن وزگەرىستەرگە كۋا بولاتىنىنا ۋادە بەردى.
باسپا ءسوز كونفەرەنسياسىندا ديماش ءوزىنىڭ «ەۆروۆيدەنيە» بايقاۋىنا رەسەي فەدەراتسياسىنىڭ اتىنان قاتىساتىنى تۋرالى قاۋەسەتتى جوققا شىعاردى: «مەن بۇل جارىستى جوعارى دارەجەلى دەپ سانايمىن، قۇرمەتتەيمىن. ءبىراق مەن وعان قاتىسۋىمنىڭ قاجەتى جوق دەپ ويلادىم. ەگەر وسى ەلدە تۋعان بولسام، رەسەيدىڭ اتىنان شىعار ەدىم. مەن - قازاقستاننىڭ ازاماتىمىن جانە ءوز وتانىمنىڭ پاتريوتىمىن، سوندىقتان بۇل تۋرالى اڭگىمەنىڭ مۇلدە نەگىزى جوق»، - دەگەن ديماش بولاشاقتاعى جوسپارلارىمەن دە ءبولىستى.
«ءدال قازىرگى تاڭدا كونسەرت قويىپ، بەينەتاسپالار ءتۇسىرۋدى قولعا الىپ ءجۇرمىن. بارلىق تۋرلاردان كەيىن، ارينە، دوستارىممەن دەمالعىم كەلەدى (كۇلەدى). جۇمىس كەستەسى مەن كونسەرتتەر ازىرگە بوساڭسۋدى قاجەت ەتپەيدى. الايدا، مەن بۇعان قينالمايمىن، ويتكەنى مۋزىكاسىز، شىعارماشىلىقسىز، قاۋىرت جۇمىسسىز ۇزاق ءومىر سۇرە المايتىنىمدى تۇسىنەمىن»، - دەدى ءانشى.
ديماش كىشكەنتاي ارمانى تۋرالى - قازاق تىلىندە جاھاندىق حيت شىعارۋ جايىندا تىلگە تيەك ەتتى.
ماسەلەن، K-pop مۋزىكاسى ارقىلى بۇكىل الەم كورەي تىلىندە ءان شىرقادى. قازاقستاندىق ءانشى دە جاڭا اندەرىنىڭ ءبىرى ءدال وسىنداي ناتيجە كورسەتەدى دەگەن ۇمىتتە. سەبەبى، «مۋزىكادا شەكارا مەن ۇلت جوق».
ديماشتىڭ بۇل باعىتتاعى ويىن اكەسى جالعاستىردى.
«حيت تۋىندى ءتىل تاڭدامايدى. ونىڭ اندەرىن قازاق تىلىندە ءارتۇرلى ەلدەردىڭ تۇرعىندارى قالاي شىرقايتىنى مەنى شىنىمەن تاڭعالدىرعان بولاتىن. مىسالى، امەريكادا وتكەن كونسەرتتە 54 مەملەكەتتەن كەلگەن جانكۇيەرلەر بولدى، 44 شتاتتان كەلگەن كوپشىلىك ستاديوندا ديماشپەن بىرگە ءان شىرقادى. ورىس، قازاق جانە باسقا تىلدەردە. بۇل وتە كۇشتى! كورەرمەن ءوز ءانشىسىنىڭ شىعارمالارىن جاقسى كورەتىن بولسا، وعان ءتىل دە، ۇلت تا كەدەرگى بولا المايدى»، - دەدى قانات ايتبايەۆ.
ديماش قىتايداعى جانكۇيەرلەرىنىڭ جاعدايىنا دا ەرەكشە نازار اۋداردى، دارىگەرلەر ولىمگە اكەلەتىن كوروناۆيرۋستى ەمدەۋدىڭ جولىن تەزىرەك تابادى دەگەن سەنىمىن ءبىلدىردى.
باسقوسۋ سوڭىندا ديماش ەكسكليۋزيۆتى جوسپارلارىمەن ءبولىستى. ماسەلەن، ول ءوزىنىڭ (اتى- ءجونىن ايتپادى) رەپەر دوسىمەن جاڭا ءان دايىنداۋدا. سونداي-اق، قازاقستاندىق تالانت تاعى ءبىر جاڭا كومپوزيتسيانى ماسكەۋدەگى كونسەرتتە كوپشىلىك نازارىنا ۇسىنباق. الايدا، بۇل تۋرالى دا تولىعىراق توقتالعان جوق.
ەسكە سالساق، بۇعان دەيىن ديماشتىڭ ەۋروپا قالالارىنداعى كونسەرتى باستالعانى تۋرالى حابارلاعان بولاتىنبىز.