ماسكۇنەم رەتىندە تىركەۋدە تۇرعانداردىڭ ءاربىر بەسىنشىسى - ايەل

پەتروپاۆل. قازاقپارات - سولتۇستىك قازاقستان وبلىسىندا التى مىڭعا جۋىق ادام ماسكۇنەم رەتىندە ناركولوگيالىق ورتالىقتا ەسەپتە تۇر، دەپ حابارلايدى قازاقپارات ءتىلشىسى.

س ق و پسيحيكالىق دەنساۋلىق ورتالىعىنىڭ مالىمەتىنشە، قازىرگى تاڭدا وڭىردە سپيرتتىك ىشىمدىكتەرگە اۋەس 5675 ادام تىركەۋدە تۇر. بۇل - 2018-جىلمەن سالىستىرعاندا تومەن كورسەتكىش.

«2019-جىلى ورتالىقتا 5675 ادام ەسەپتە تۇرسا، 2018-جىلى 5768 ادام بولاتىن. ءبىزدىڭ تىركەۋدەن ءبىرقاتار تالاپتار ورىندالعان جاعدايدا عانا الىنادى. ول ءۇشىن پاتسيەنتىمىز اي سايىن پسيحياتر-ناركولوگقا قارالۋى ءتيىس. سپيرتتىك ىشىمدىكتەن باس تارتىپ، ەمىن جالعاستىرۋى كەرەك. سونداي-اق پسيحولوگيالىق كومەك تە الۋى قاجەت»، - دەيدى وبلىستىق پسيحيكالىق دەنساۋلىق ورتالىعىنىڭ ناركولوگ دارىگەرى ەلەنا شارابار.

قازىر ورتالىقتا 5 مىڭنان استام ادام ەسەپتە تۇرسا، سونىڭ مىڭنان استامى - ايەلدەر. ارالارىندا بالا دا بار. 24 جاس ءوسپىرىم ناركولوگتىڭ باقىلاۋىنا الىنعان.