ازىق- تۇلىك ونىمدەرى حالىققا قولجەتىمدى بولۋى ءتيىس - داريعا نازاربايەۆا

None
None
نۇر- سۇلتان. قازاقپارات - قازاقستان رەسپۋبليكاسى پارلامەنتى سەناتىنىڭ ءتوراعاسى داريعا نازاربايەۆا پارلامەنتتىك تىڭداۋلارعا دايىندىق اياسىندا ەلىمىزدىڭ مەملەكەتتىك ورگاندارىنىڭ وكىلدەرىنىڭ جانە اۋىل شارۋاشىلىعى ونىمدەرىن وندىرۋشىلەردىڭ قاتىسۋىمەن ەت ءوندىرىسى سالاسىنىڭ قازىرگى جاعدايىنا ارنالعان كەزدەسۋ وتكىزدى.

بۇل جونىندە سەناتتىڭ باسپا ءسوز قىزمەتىنە سىلتەمە جاساپ قازاقپارات حابارلايدى.

جۇزدەسۋگە سەنات دەپۋتاتتارى، اۋىل شارۋاشىلىعى مينيسترلىگىنىڭ وكىلدەرى مەن مال شارۋاشىلىعى بويىنشا ءونىم وندىرۋشىلەر قاتىستى.

الدىمەن اۋىل شارۋاشىلىعى ءمينيسترىنىڭ ءبىرىنشى ورىنباسارى ايداربەك ساپاروۆ قازاقستانداعى مال شارۋاشىلىعىنىڭ قازىرگى كۇي- جايىمەن تانىستىردى.

ءمينيستردىڭ ءبىرىنشى ورىنباسارى ەت ءوندىرىسى ەلىمىزدەگى نەگىزگى سالالاردىڭ ءبىرى ەكەنىن ايتا كەلىپ، وتكەن جىلى 1,1 ميلليون توننا ەت وندىرىلگەنىن جەتكىزدى.

«وتاندىق ەت ونىمدەرىنىڭ ەكسپورتى ايتارلىقتاي ەمەس. 2019 -جىلى 372 توننا شۇجىق جانە 769 توننا كونسەرۆى ونىمدەرى ەكسپورتتالدى. سونىمەن قاتار، قازاقستاننان 156063 ءىرى قارا جانە 263737 ۇساق مال سىرتقا جونەلتىلدى» ، - دەيدى ا. ساپاروۆ.


2019 -جىلدىڭ قازان ايىندا ەلىمىزدەن ءىرى قارا مەن ساۋلىقتاردى سىرتقا شىعارۋعا تىيىم سالىنعانىنا قاراماستان 26781 ءىرى قارا جانە 22272 باس ۇساق مال اكەتىلگەن.

سەنات ءتوراعاسى داريعا نازاربايەۆا مال شىعارۋعا تىيىم سالۋ جانە ونىڭ زارداپتارى ماسەلەسىن كوتەردى.

«بىزگە تەك كولەممەن عانا ەمەس، ساپامەن دە، باعاسىمەن دە الۋىمىز كەرەك. ەت ءدامدى، ساپالى جانە باعاسى قولجەتىمدى بولۋى ءتيىس. بۇگىن ءبىزدىڭ قولىمىزدا نە بار؟ ەت باعاسى وتە تەز وسەدى. بىزدە ەت بار، ءبىراق ءبىزدىڭ نارىقتا نەگە قىمبات؟ ونىڭ ۇستىنە، ەلىمىز بەن حالقىمىز ەتتى باعدارعا الادى. ماڭىزى جاعىنان ناننان كەيىنگى ەكىنشى ءونىم - ەت» ، - دەدى د. نازاربايەۆا.

باتىس قازاقستان وبلىسىنداعى «كۋبلەي» سەرىكتەستىگىنىڭ باس ديرەكتورى تالعات بەرەكەشيەۆ قايتا وڭدەۋ ونەركاسىپ ورىندارىنىڭ باستى ماسەلەلەرىنە توقتالدى. ونىڭ پىكىرىنشە، ءبىزدىڭ قايتا وڭدەۋ كاسىپورىندارىنىڭ ماسەلەسى - قۋاتتاردىڭ تولىق ىسكە قوسىلماي تۇرعانى.

«ەت كومبيناتتارى %40-45 قۋاتىندا جۇمىس ىستەپ تۇر. اۋىل شارۋاشىلىعى مينيسترلىگىنىڭ بۇگىنگى كۇنى قولدانىستاعى ءونىمدى مال شارۋاشىلىعى جونىندەگى باعدارلاماسى باستى سەبەپ بولۋدا. وعان سايكەس، بارلىق سۋبسيديالار وندىرىستىك كاسىپورىنداردا شيكىزاتتى قايتا وڭدەۋگە ەمەس، بورداقىلاۋ الاڭدارى ارقىلى جىبەرىلەدى. سوندىقتان فەرمەرلەر مالدى ەت كومبيناتىنا ەمەس، بورداقىلاۋ الاڭىنا تاپسىرسا عانا مالعا سۋبسيديا الادى. ياعني، ولار بىزگە ەت بەرۋگە قۇشتار ەمەس. ال بورداقىلاۋشىلارعا ەكسپورت ءتيىمدى، سوندىقتان سۋبسيديامەن الىنعان مال ساتىپ الۋشىلارعا كەتەدى» ، - دەپ اتاپ ءوتتى ت. بەرەكەشيەۆ.

سەنات ءتوراعاسى جاۋاپ رەتىندە ايتقان سوزىندە ەگەر ءار زاۋىت ەڭ بولماعاندا %90 قۋاتىندا جۇمىس ىستەگەن بولسا، وندا ءونىم كولەمى مۇلدەم باسقا ءارى نارىقتاعى بولشەك باعا دا باسقا بولادى، بۇل رەتتە دەلدالدار ازايادى.

«قازىر ءبىز حالىق تاماعىنىڭ توق بولۋىن، نەگىزگى ازىق- تۇلىكتىڭ قولجەتىمدى بولۋىن ويلاستىرۋىمىز كەرەك. بۇل ءبىزدىڭ باستى مىندەتىمىز. اۋىل شارۋاشىلىعىنىڭ الدىندا سالا رەتىندە باسىمدىقتار بار. قازاقستاندىقتار تۋرالى ۇمىتپايىق. ولاردىڭ داستارقانىندا قولجەتىمدى ءدامدى ەت بولۋى كەرەك. الدىمەن ازىق- تۇلىك قاۋىپسىزدىگىن ويلاۋ كەرەك. ءوز ەلىمىزدىڭ توقشىلىقتا بولۋى ماڭىزدى» ، - دەدى د. نازاربايەۆا.

سەنات باسشىسى ەت سالاسىنىڭ قازىرگى جاعدايى تۋرالى ايتا كەلىپ، ونىڭ جەڭىل ونەركاسىپپەن بايلانىسىن اتاپ ءوتتى.

«مال سويۋ - بۇل دا ماڭىزدى ماسەلە. سەبەبى تەرىنىڭ ساپاسى بىزدە جەڭىل ونەركاسىپتىڭ دامۋىنا اسەر ەتەدى. بۇل ماسەلەگە بارلىق جاعىنان كەشەندى تۇردە قاراۋ كەرەك» ، - دەدى ول.

داريعا نازاربايەۆا كەزدەسۋدى قورىتىندىلاي كەلىپ، پارلامەنتتىك تىڭداۋدان كەيىن دە جۇمىس جالعاساتىنىن اتاپ ءوتتى.

«2020 -جىلدىڭ سوڭى - 2021 -جىلدىڭ باسىنا قاراي اگروونەركاسىپتى دامىتۋدىڭ جول كارتاسى دايىن بولادى. زەردەلى زاڭدار مەن ەرەجەلەر قابىلدانۋى كەرەك. سىزدەرمەن مۇددەمىز ورتاق - اۋىل شارۋاشىلىعىن كوتەرۋ، وتاندىق ءوندىرىستىڭ ءدامدى ءارى ارزان ونىمدەرى داستارقاندا مول بولۋى ءۇشىن باي ەل بولۋ كەرەك. ونى قاراپايىم زاتتاردىڭ ەكونوميكاسى دەيمىز» ، - دەدى د. نازاربايەۆا.

سوڭعى جاڭالىقتار