قىتايدا كوروناۆيرۋسقا شالدىققانىن جاسىرعاندار ءولىم جازاسىنا كەسىلۋى مۇمكىن
قىتايدا بۇل دەرتكە شالدىققانىن جاسىرماق بولعاندار ەندى ءولىم جازاسىنا كەسىلۋى مۇمكىن. بۇل عانا ەمەس. ساياحاتقا شىققاندار ساپارىنىڭ جاي- جاپسارى تۋرالى تولىق اقپارات بەرمەسە، ولار دا جازالانادى.
كوروناۆيرۋستان قازا تاپقاندار سانى تاعى ارتتى. دەگەنمەن الەمدىك ب ا ق جانە قىتايدىڭ ءوزى قۇرباندار سانى تومەندەپ جاتىر دەگەندى ايتادى. ال كرۋيزدەگى لاينەردە دەرت جۇقتىرعاندار سانى 355-كە جەتتى. ينفەكسياعا شالدىعىپ، ۆيرۋس تاراتقاندار قوعام قاۋىپسىزدىگىنە قاتەر توندىرەدى. سوندىقتان ءوز دەرتىن نەمەسە ۆيرۋستى جۇقتىرعاندار تۋرالى اقپاردى جاسىرىپ قالماق بولعاندار 10 جىل نەمەسە ءومىر باقي باس بوستاندىعىنان ايىرىلۋى مۇمكىن. ءتىپتى ءولىم جازاسىنا تارتۋ دا قاراستىرىلماق. قىتايدىڭ دەنساۋلىق ساقتاۋ ۇلتتىق كوميسسياسى وسىنداي شەشىمگە كەلدى.
سونداي- اق جوتەل، دەنە قىزۋى بار تۇرعىندارعا قوعامدىق كولىك پەن پويىزعا جانە ۇشاققا مىنۋگە تىيىم سالىندى. ەپيدەميا وشاعىنان ۇيىنە ورالعاندار 14 كۇن بويى سىرتقا شىقپاۋى كەرەك نەمەسە كارانتينگە بارۋى ءتيىس. 15- اقپاننان باستاپ بۇل شارانى ورىنداماعاندار زاڭمەن قۋدالانباق. شەت مەملەكەتتەر بيلىكتىڭ بۇل باستاماسىن قۇپتاپ وتىر.
منانگاگۆا ەممەرسون، زيمبابۆە پرەزيدەنتى:
- قىتاي بيلىگى قازىر بۇل ۆيرۋستىڭ تاراپ كەتپەۋى ءۇشىن قولدان كەلگەنىن جاساپ جاتىر. سوڭعى كەزدەرى كوروناۆيرۋستى جۇقتىرعاندار سانى ازايىپ كەلەدى. مۇنىڭ بارلىعى وسىنداي قاتاڭ شەكتەۋلەر مەن جىلدام الدىن الۋ شارالارىنىڭ ناتيجەسى.
قىتاي حالىق رەسپۋبليكاسىنىڭ دەنساۋلىق ساقتاۋ مەملەكەتتىك كوميتەتى دە ۆيرۋستان كوز جۇمعانداردىڭ سانى سوڭعى ءتورت كۇندە تومەندەدى دەپ اقپار تاراتقان. ىندەتتەن 11 مىڭ ادام ەمدەلىپ شىقتى دەگەن دە حابار بولعان. دەسە دە قاۋىپتى كەسەلگە شالدىققاندار سانى ءبىر كۇندە تاعى 2048 ادامعا كوبەيىپ شىعا كەلدى. سونىمەن سوڭعى دەرەكتەر مىناداي.
قىتايدا COVID19 دەرتىن جۇقتىرعاندار سانى 70578-گە جەتتى. كوز جۇمعاندار - 1770. قىتايدان وزگە ەلدەردە ۆيرۋستى جۇقتىرعان 778 ادام تىركەلدى. جاپونيا، گونكونگ، فرانسيا، تايۆان جانە فيليپپيندە ءبىر- ءبىر ناۋقاستان كوز جۇمدى. ال حۋبەي پروۆينتسياسىنداعى ەپيدەميا شىققان ۋحاندا جاعداي ءماز ەمەس. تۇرعىندارعا توتەنشە جاعداي بولماسا، ۇيدەن شىعۋعا تىيىم سالىنعان. ازىق- تۇلىك، تۇرمىستىق زاتتار الۋ ءۇشىن ءار وتباسى ءۇش كۇندە ءبىر رەت قانا سىرتقا شىعا الادى.
داي ۆەيمين، اۋرۋحانا ديرەكتورىنىڭ كومەكشىسى:
- بۇل قادامدار ارقىلى ەپيدەميانى باقىلاۋدا ۇستاپ وتىرمىز. ستاتيستيكاعا سۇيەنسەك، سوڭعى بەس كۇندە دەنە قىزۋى بار تۇرعىندار سانى تومەندەگەن. ناۋقاستاردى باتىس جانە ءداستۇرلى مەديتسيناعا سۇيەنىپ، ەمدەپ جاتىرمىز. ەپيدەميا باسىلدى دەۋگە بولادى.
بۇل ارادا ۋحانداعى اۋرۋحانالاردىڭ بىرىندە ءبىر توپ دارىگەر كوروناۆيرۋستان ەمدەلىپ جاتقان ناۋقاستارعا مەرەكەلىك كوڭىل كۇي سىيلاعانىن ايتا كەتەيىك. ولار پاتسيەنتتەرگە ارناپ، ۇلتتىق بي بيلەپ، شاعىن كونسەرت ۇيىمداستىردى. مۇنداي توسىنسىيعا ناۋقاستار دا ءماز. اق حالاتتىلار اۋرۋدان قاجىپ، ۇنجىرعاسى تۇسكەن ازاماتتاردىڭ كوڭىل- كۇيىن وسىلاي اۋلاپ جاتىر. مۇنداي قيمىل- قوزعالىس ەمدەلۋشىلەردىڭ تەزىرەك ايىعىپ كەتۋىنە سەپتىگىن تيگىزەدى دەيدى دارىگەرلەر.
ال Diamond Princess - كرۋيزدىك لاينەرىندە كوروناۆيرۋس جۇقتىرعاندار سانى 355-كە جەتتى. بۇل كەمە ەكى اپتادان بەرى جاپونيا جاعالاۋىندا كارانتيندە تۇر. شەت مەملەكەتتەر لاينەردە بولعان ءوز ازاماتتارىن ەۆاكۋاتسيالاپ جاتىر. مۇندا ءتورت قازاقستاندىق تا بار ەكەنى جوعارىدا ايتىلعان بولاتىن. ولاردى ەلگە قايتارۋ تۋرالى ءالى اقپار تارامادى. بورتتا جالپى 50 ەلدەن 3700 دەي ادام بار. بۇگىن رەسەيلىك ازاماتشانىڭ ۆيرۋس جۇقتىرعانى انىقتالدى.
سونىمەن قاتار Westerdam لاينەرىنەن دە تۋريستەر ەۆاكۋاتسيالانىپ جاتىر. بۇل - كامبودجادا كارانتيندە تۇرعان كەمە. مالايزيا، ا ق ش، رەسەي ءوز ازاماتتارىن ەلدەرىنە قايتارىپ ۇلگەردى. قازىر ولار دارىگەرلەردىڭ باقىلاۋىندا. ال قاۋىپتى كەسەل بۇگىندە افريكاعا جەتتى. ەلدىڭ دەنساۋلىق ساقتاۋ مينيسترلىگى ۆيرۋس ەلگە كەلگەن شەتەلدىك ازاماتتان انىقتالعانىن ايتادى. ال فرانسيادا قىتايلىق تۋريست كوز جۇمدى. بۇل - ەۋروپادا كورونوۆيرۋستان كوز جۇمعان العاشقى قۇربان.
انەس بيۋزەن، فرانسيا دەنساۋلىق ساقتاۋ ءمينيسترى:
- 80 جاستاعى ەر ادام حۋبەي ەلدى مەكەنىنەن 16- قاڭتار كۇنى تۋريست رەتىندە كەلگەن. 25 - قاڭتاردا اۋرۋحانادا جەتكىزىلەدى. ول وزگە ناۋقاستاردان وقشاۋ جەردە بولدى. سوڭعى بىرنەشە كۇن بويى جاعدايى قيىنداپ، جان ساقتاۋ بولىمىندە بولعان ەدى.