ورحان ەسكەرتكىشىنىڭ تولىق اتلاسى جارىق كوردى

نۇر- سۇلتان. قازاقپارات - ەلوردادا بەلگىلى تۇركولوگ عالىم قارجاۋباي سارتقوجا ۇلىنىڭ «ورحون ەسكەرتكىشتەرىنىڭ تولىق اتلاسى» جۇرتشىلىققا تانىستىرىلادى، دەپ حابارلايدى قازاقپارات.

21 - اقپاندا ۇلتتىق اكادەميالىق كىتاپحانادا 3 تومدىق ىرگەلى ەڭبەك - «ورحون ەسكەرتكىشتەرىنىڭ تولىق اتلاسى» تانىستىرىلادى.

اتلاستا ەۋرازيا ۇلى دالاسىنا ءۇش عاسىر بويى بيلىك جۇرگىزگەن، وزدەرىنىڭ تاريحىن، دۇنيەتانىمىن، دانالىعىن، وي- ساناسىن، بولمىسىن، جازۋ ونەرىن، ەل باسقارۋ جۇيەسىن، اتا ءداستۇرىن وشپەستەي ەتىپ تاسقا قاشاپ كەتكەن، وركەنيەتكە، ادامزات مادەنيەتىنە اسىل قازىنا قوسقان بايىرعى تۇرىكتەردىڭ مۇرالارى تۇگەل قامتىلعان.

التاي، ورحون، سەلەڭگى، كەرۋلەن بويىنان تابىلعان كوك تۇرىك يمپەرياسى داۋىرىندەگى (500-900 ج ج) تاس ۇستىنعا 2000 جىل بۇرىن قاشاپ جازعان ءتۇپنۇسقادا تاريح، ءتىل ادەبيەت (ءسوز ونەرى)، ءسوز اسپابى، بايىرعى ارحيتەكتۋرا جانە فيلوسوفياسى مەن سالت- داستۇرلەرىنىڭ مۇرالارى قامتىلعان.

اتلاستا موڭعوليا- چەحيا، موڭعوليا- تۇركيا (ت ي ك ا)، موڭعوليا- س س س ر بىرىككەن ەكسپەديسيالارىنىڭ، ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتى ەكسپەديتسياسىنىڭ ماتەريالدارى، سونداي- اق الەم تۇرىكتانۋشىلارىنىڭ عاسىردان استام ۋاقىت جۇرگىزگەن زەرتتەۋلەرىنىڭ قورىتىندىسى پايدالانىلعان.

«اتلاس اۆتورى بايىرعى تۇرىك ماتىندەرىن قايتا كوشىرىپ، قايتا وقىعان، بۇرىنعى زەرتتەۋشىلەردىڭ قاتەلەرى تۇزەتىلگەن، ءتۇپنۇسقا ءماتىنىنىڭ جاڭا ترانسكريپتسياسى، جاڭا اۋدارماسى جاسالعان، جاڭا تۇسىنىكتەمەسى بەرىلگەن؛ جارتىلاي كوشپەلى ءداۋىردىڭ تاريحي- مادەني مۇرالارى اتلاستا تەگىس قاراستىرىلىپ، ولاردىڭ ارحەولوگيالىق سيپاتتاماسى، پلانى، فوتو، سىزبا سۋرەتتەرى تۇڭعىش رەت تولىق بەرىلگەن»، دەلىنگەن حابارلامادا.

اتلاس ءتىلشى، تاريحشى، ەتنوگراف، ارحەولوگ، فيلوسوف، ادەبيەتشى جانە مادەنيەتتانۋشى ماماندارعا، سونداي- اق ستۋدەنتتەرگە، ماگيسترانتتارعا، اسپيرانتتارعا، ىزدەنۋشىلەرگە ارنالعان.