اۋە كومپانيالارى كامبودجاداعى لاينەردىڭ جولاۋشىلارىن قابىلداۋدان باس تارتىپ وتىر
بۇعان دەيىن ازياداعى بەس پورت بۇل كەمەنى كوروناۆيرۋستان قاۋىپتەنىپ كىرگىزۋدەن باس تارتقان بولاتىن، دەپ حابارلايدى قازاقپارات Kyodo عا سىلتەمە جاساپ.
مالايزيا جولاۋشىلاردىڭ بىرىندە ۆيرۋستىڭ بار- جوعىن انىقتايتىن تەست وڭ ناتيجە كورسەتكەنىن مالىمدەگەننەن سوڭ وسىنداي جاعداي ورىن الدى. ايەل ادام سيانۋكۆيل پورتىنىڭ وڭتۇستىك- باتىسىندا The Westerdam كەمەسىنەن ءتۇسىپ قالعاننان كەيىن جۇما كۇنى مالايزياعا ۇشىپ كەتتى.
جاپونيا، تايۆان، فيليپپين، گۋاما جانە تايلاند پورتتارى كەمەنى كىرگىزۋدەن باس تارتقاندىقتان كامبودجا ۇكىمەتى لاينەردى بەيسەنبى كۇنى بايلاپ قويۋعا رۇقسات ەتتى.
قازىرگى كۇنى 2257 جولاۋشى مەن ەكيپاج مۇشەلەرىنىڭ 1000 عا جۋىعى كامبودجادان كەتتى. ولاردىڭ 1255 ءى كەمەدەن جۇما كۇنى تاڭەرتەڭ شىعىپ كەتتى.
دەرەككوزدىڭ مالىمەتى بويىنشا، كامبودجا مەن قۇرامىندا ا ق ش بار مۇددەلى تاراپتار، كوممەرتسيالىق اۋەكومپانيالارىنا جۇگىنىپ، كەمەدەگى جولاۋشىلاردى ەلدەن اكەتۋدى وتىنگەن. ولار ءتۇرلى باعىتتاعى چارتەرلىك رەيستەردى جالداۋعا تىرىسقان، ءبىراق ءساتسىز بولدى.
دۇيسەنبى كۇنى ەلدىڭ پرەمەر- ءمينيسترى حۋن سەن ءوزىنىڭ Facebook پاراقشاسىندا جازبا قالدىردى.
«500 شەتەل تۋريسى تەكسەرىستەن ءوتىپ، ەشقايسىسىندا COVID-19 ۆيرۋسىنىڭ بەلگىلەرى انىقتالعان جوق. قازىرگى ۋاقىتتا ولار ۋاقىتشا پنومپەندەگى «سوحا» قوناقۇيىنە ورنالاستىرىلدى. ەگەر مەملەكەت ازاماتتارىنا قامقورلىق تانىتپاسا، كامبودجا ولارعا دەگەن جاۋاپكەرشىلىكتى موينىنا الادى، سەبەبى ولار ءبىزدىڭ ەلىمىزدە - قاۋىپسىز جەردە» ، - دەدى پرەمەر- مينيستر.
The Westerdam سيانۋكۆيلدە توقتاپ، بايلانعان ساتتە حۋن سەن جولاۋشىلار مەن توپتى جىلى قارسى الىپ، ولارعا گۇل مەن شارف سىيلادى.
بورتىندا 1455 تۋريست پەن 802 ەكيپاج مۇشەسى بولعان كەمە 1 - اقپان كۇنى گونكونگتان ساپارعا اتتانعان. لاينەر شىعىس ازيانىڭ ءبىرقاتار ەلدەرىنە بارىپ، 14 كۇندىك ساياحاتتى يوكوگامادا اياقتايدى دەپ جوسپارلانعان بولاتىن.
كەمەنى قابىلداماس بۇرىن ەلدىڭ دەنساۋلىق ساقتاۋ ورگاندارى اۋىرىپ قالعان 20 جولاۋشىنى تەكسەرىپ، تالداۋ جاسادى. تەستتىڭ ناتيجەلەرى تەرىس ناتيجە كورسەتتى.
دەنساۋلىق ساقتاۋ قىزمەتكەرلەرىنىڭ ءبىرىنىڭ سوزىنشە، جولاۋشىلار قاتارىندا مالايزيادا تەست وڭ ناتيجە كورسەتكەن 83 جاستاعى ايەل ادام جوق.
ۇكىمەت وكىلدەرىنىڭ ايتۋىنشا، كامبودجادا قالعانداردىڭ بارلىعى ۆيرۋستىڭ بار- جوعىن انىقتايتىن تالداۋ تاپسىرۋى كەرەك.