اسقار مامين ساۋدا مينيسترىنە ءبىرقاتار تاپسىرما بەردى

نۇر-سۇلتان. قازاقپارات - بۇگىن ۇكىمەت وتىرىسىندا ق ر پرەمەر-ءمينيسترى اسقار مامين ق ر ساۋدا جانە ينتەگراتسيا ءمينيسترى باقىت سۇلتانوۆقا ەلەكتروندى كوممەرتسيانى دامىتۋعا باعىتتالعان ءبىرقاتار تاپسىرما بەردى، دەپ حابارلايدى قازاقپارات ءتىلشىسى.

«ەلەكتروندى كوممەرتسيا ەكونوميكانىڭ ەڭ قارقىندى دامىپ كەلە جاتقان سەگمەنتتەرىنىڭ ءبىرى سانالادى. تاۋارلار مەن قىزمەتتەردى ينتەرنەت ارقىلى ساتىپ الاتىن ادامدار سانى جىل سايىن ءوسىپ كەلەدى. ادەتتەگى دۇكەندەرگە قاراعاندا بۇل وڭاي ءارى ارزان. قىزمەتتەر مەن تاۋارلار ينتەرنەت ارقىلى راسىمدەۋ جاڭا جۇمىس ورىندارىن قۇرادى. ءبىزدىڭ بەلسەندى ونلاين ساتىپ الۋشىلاردىڭ سانى قارقىندى دامۋدا. 2018-جىلى 2,3 ميلليون ادام بولسا، وتكەن جىلى بۇل كورسەتكىش 3,2 ميلليون ادامعا جەتتى جانە ونلاين ساتىپ الۋشىلاردىڭ سانى قارقىندى ءوسىپ كەلەدى. بۇل الەمدىك ترەندكە تولىق سايكەس»، - دەدى ۇكىمەت باسشىسى.

وسىعان بايلانىستى پرەمەر-مينيستر ءبىرقاتار ماسەلەگە توقتالىپ، ساۋدا مينيسترىنە ناقتى تاپسىرمالار جۇكتەدى.

«ءبىرىنشى، قازاقستاندىقتار تاۋارلاردى شەتەلدىك ينتەرنەت دۇكەندەردەن بەلسەندى تۇردە ساتىپ الا باستادى. ال وتاندىق وندىرۋشىلەر الەمدىك ونلاين الاڭدارعا شىعا باستادى. وسى باعىتتاعى بەلسەندىلىكتى ارتتىرۋ كەرەك. ساۋدا مينيسترلىگىنە ەلەكتروندى الاڭدار ارقىلى ونىمدەرىمىزدى ەكسپورتقا شىعارۋ شارالارىن ازىرلەۋدى تاپسىرامىن. ەكىنشى، ەلەكتروندى ساۋدانى دامىتۋ ءۇشىن ءتيىستى ينفراقۇرىلىم قاجەت. رەسپۋبليكانىڭ ءىرى قالالارىنىڭ بارىندە كولىك-لوگيستيكالىق ورتالىقتاردىڭ الەۋەتىن ارتتىرۋ كەرەك. ساۋدا مينيسترلىگى سيفرلىق دامۋ مينيسترلىگىمەن بىرگە ينفراقۇرىلىمدى دامىتۋ تەتىكتەرىن ازىرلەپ، ءىس-شارالاردى ەلەكتروندى كوممەرتسيانى دامىتۋ جونىندەگى 2025-جىلعا دەيىنگى جول كارتاسىنا قوسسىن»، - دەدى اسقار مامين.

ۇشىنشىدەن، ۇكىمەت باسشىسى ەلەكتروندى كوممەرتسيانىڭ قارقىنى دامۋىنا بايلانىستى جاڭا ماماندىقتار شىعىپ، جۇمىس ورىندارىنىڭ سانى ءوسىپ كەلە جاتقاندىعىنا اۋداردى.

«سوندىقتان قازاقستاننىڭ ءىرى قالالارىندا E-commerce ورتالىقتارىنىڭ بازاسىندا وقىتۋدى قولعا الۋ كەرەك. ساۋدا، ءبىلىم، سيفرلىق دامۋ مينيسترلىكتەرى جانە «قازپوشتا» ا ق سۇرانىسقا يە ماماندىقتاردى وقىتۋ مەن قايتا دايىنداۋ بويىنشا جۇمىستى جالعاستىرىپ، ەلەكتروندى ساۋدانى جۇرگىزۋگە نازار اۋدارۋى ءتيىس. جالپى، ساۋدا مينيسترلىگىنە ءبىر اپتا مەرزىمدە ەلەكتروندى كوممەرتسيانى دامىتۋ جونىندە جول كارتانى بۇگىنگى ايتىلعان تاسىلدەردى ەسكەرە وتىرىپ جاڭارتۋدى تاپسىرامىن»، - دەدى ول.