سۇلۋلىققا كارتوپتىڭ پايداسى
ارزان بولعانىمەن ونىڭ قابىعىنىڭ استىندا پايدالى زاتتار كوپ ەكەنىن دە ءبىلىپ جۇرەيىك. قاراپايىم كارتوپتى ءۇي جاعدايىندا كوسمەتيكالىق قۇرال رەتىندە پايدالانۋدىڭ جولدارىن ۇسىنامىز.
كوز
قيار كەسەكتەرىن قويۋ ارقىلى كوز ءىسىنۋىن كەتىرۋگە بولاتىنىن بىلەمىز. كارتوپتى دا سول ماقساتتا پايدالانۋعا بولادى. كارتوپتى جىڭىشكە ەتىپ تۋراڭىز نەمەسە ۇككىشتەن وتكىزىپ، داكەگە سالىپ، كوزدە 10-15 مينۋت شاماسىندا ۇستاڭىز. ۋاقىت وتكەن سوڭ بەتىڭىزدى جىلى سۋمەن جۋىپ تاستاڭىز.
تەرى
تەرىگە بەزەۋ شىعىپ كەتسە، ونى ءۇش كۇن قاتارىنان كارتوپ سۋسىنىمەن ءسۇرتىڭىز. كارتوپ سۋسىنى كۇنگە قاتتى كۇيگەن تەرىنىڭ اشىعانىن باسۋعا دا كومەكتەسەدى. كارتوپتى قايناتقان سۋدى سۋىتىپ، ونى بەت جۋۋعا ارنالعان تونيك رەتىندە قولدانۋعا بولادى. مۇنداي تونيكتى توڭازىتقىشقا قويۋ قاجەت جانە 2-3 كۇننەن ارتىق ساقتاۋعا بولمايدى.
شاش
ەگەر شاش ءتۇسىن قارايتقىڭىز كەلسە، كارتوپ قابىعىنان دايىندالاتىن شايۋعا ارنالعان سۇيىقتىق دايىنداڭىز. جۋىلعان ءىرى كارتوپتىڭ قابىعىن جانە ءبىر انار قابىعىن ىدىسقا سالىڭىز. قابىقتى جاۋىپ تۇراتىن ەتىپ سۋ قۇيىڭىز. قايناتىڭىز، ودان سوڭ وتتان الىپ، سۋىتىڭىز. سۋىن ءسۇزىپ الىپ، شاشىڭىزدى سۋسابىنمەن جۋىپ بولعاننان كەيىن، جاڭاعى سۇيىقتىقپەن شايىڭىز. ناتيجەسىندە شاشىڭىز تابيعي تۇسىنە قاراعاندا ازداپ قارايعانىن بايقايسىز.
شاعۋ جانە كۇيىك
كارتوپ جاندىك شاققاندا نەمەسە كىشىگىرىم كۇيىكتەن پايدا بولاتىن اۋرۋدى باسۋعا كومەكتەسەدى. شيكى كارتوپ كەسىندىسىن اۋىرىپ تۇرعان جەرگە 5 مينۋتقا باسىڭىز.
ەسىڭىزدە بولسىن، ەگەر تەرىنى كۇيدىرىپ الساڭىز، زاقىمدانعان جەردى الدىمەن سالقىنداتۋ كەرەك. كۇيگەن جەردى كراننان اققان وتە سۋىق سۋعا ۇستاڭىز نەمەسە 10 مينۋت شاماسىندا مۇز باسىڭىز. سۋىقتىڭ تاراۋ جىلدامدىعى جىلۋدىڭ تاراۋ جىلدامدىعىنان از. سوندىقتان 1 سەكۋندتا كۇيدىرىپ العان جەرىڭىزدى 10 مينۋت سالقىنداتۋ قاجەت. كۇيگەن جەرگە ءتۇرلى ماي مەن كرەم قولدانۋدىڭ قاجەتى جوق.
شارشاعان جاعدايدا
كارتوپ قايناتقان سۋدى بولمە تەمپەراتۋراسىندا سۋىتىپ الىڭىز. سودان سوڭ سۋىعان سۋدى لەگەنگە قۇيىپ الىپ، شارشاپ تۇرعان اياعىڭىزدى 20 مينۋت شاماسىندا سالىپ جاتىڭىز. سونىمەن قاتار كارتوپ قايناعان سۋدا بولاتىن كراحمال اياق جارالارىنىڭ تەز جازىلۋىنا دا كومەكتەسەدى.