قىرعىزستاندا قىتاي ينۆەستيتسياسىنا قارسىلىق اكسياسى ءوتتى

نۇر-سۇلتان. قازاقپارات - قىرعىزستاننىڭ نارىن وبلىسى اتباشى اۋىلىندا جۇزدەگەن ادام جينالىپ، وسى وڭىردە قىتاي جوبالارىن جۇزەگە اسىرۋعا قارسىلىق ءبىلدىردى.

قارسىلىق اكسياسىنا جينالعانداردىڭ كەيبىرى اتپەن كەلگەن. ولار قىرعىزستان ۇكىمەتىنەن 275 ميلليون دوللار جۇمسالاتىن لوگيستيكالىق ورتالىق سالۋ جوسپارىنان باس تارتۋدى تالاپ ەتتى. لوگيستيكالىق ورتالىق سالۋ تۋرالى قىرعىز ۇكىمەتى 2019-جىلى قىرعىزستانعا كەلگەن قىتاي كومپارتياسىنىڭ ءتوراعاسى شي جينپيڭمەن ۋاعدالاسقان ەدى. ورتالىققا وندىرىستىك قۋاتى از كاسىپورىنداردى ورنالاستىرىپ، ولارعا ساۋدا جەڭىلدىكتەرىن بەرۋ كوزدەلگەن.

ۇيىمداستىرۋشىلاردىڭ ايتۋىنشا، ميتينگىگە ەكى مىڭنان استام ادام قاتىسقان. قىرعىزستان ۇكىمەتىنىڭ نارىن وبلىسىنداعى وكىلى ەميلبەك الىمقۇلوۆ قارسىلىق اكسياسىنا كەلگەندەر 700-800 ادامنان اسپايدى دەپ سانايدى. الىمقۇلوۆ قىرعىز ۇكىمەتى ميتينگى تالابىنا جاۋاپ بەرەتىنىن ايتتى.

اقپاننىڭ 17 سىنە وتكەن ميتينگىگە كەلگەندەر «لوگيستيكالىق ورتالىق سالۋعا قارسىمىز»، «قىرعىز جەرى قىتايعا بەرىلمەسىن» دەگەن ۇراندار جازىلعان باننەر ۇستاپ تۇرعان. جىل باسىنان بەرى قىرعىزستاندا قىتايدىڭ ينۆەستيتسيالىق جوبالارىنا قارسى بىرنەشە ميتينگى ءوتتى.

«ازاتتىق»