پرەزيدەنتكە باسىم ەمەس بيۋجەتتىك شىعىستاردى قىسقارتۋ بارىسى باياندالادى
بۇل تۋرالى بۇگىن ۇكىمەت وتىرىسىندا پرەمەر-مينيستر اسقار مامين ايتتى، دەپ حابارلايدى قازاقپارات ءتىلشىسى.
«بيىلعى جىلدىڭ ءساۋىر ايىندا مەملەكەت باسشىسى قاسىم-جومارت توقايەۆقا باسىم ەمەس بيۋجەتتىك شىعىستاردى قىسقارتۋ جونىندەگى تاپسىرماسىنىڭ ورىندالۋى تۋرالى بايانداۋىمىز قاجەت. رەسپۋبليكالىق بيۋجەت بويىنشا شىعىستار ناقتىلاۋ كەزىندە قايتا بولىنەدى نەمەسە ولاردى وڭتايلاندىرۋ بويىنشا ءتيىستى جۇمىس جۇرگىزىلەدى»، - دەپ اتاپ ءوتتى ۇكىمەت باسشىسى.
ونىڭ ايتۋىنشا، جەرگىلىكتى بيۋجەتتەردىڭ شىعىستارى بويىنشا اكىمدىكتەر بيۋجەتتەردىڭ ءتيىستى دەڭگەيلەرىندەگى ءماسليحاتتار ارقىلى وسى شىعىستاردى قىسقارتۋ جونىندە شەشىم قابىلداۋى قاجەت.
«ۇلتتىق حولدينگتەر مەن كومپانيالاردىڭ باسشىلارى ديرەكتورلار كەڭەستەرى مەن باسقارما وتىرىستارىنىڭ اياسىندا ۇسىنىلعان شىعىستاردى قىسقارتۋ جونىندە ءتيىستى كورپوراتيۆتىك شەشىمدەر قابىلداۋى كەرەك. قارجى مينيسترلىگى، اكىمدىكتەر، ۇلتتىق حولدينگتەر مەملەكەت باسشىسىنىڭ تاپسىرماسىنىڭ ورىندالۋىن باقىلاۋعا الۋى ءتيىس»، - دەدى اسقار مامين.
ايتا كەتەيىك، ۇكىمەت وتىرىسىندا ق ر پرەمەر-ءمينيسترىنىڭ ءبىرىنشى ورىنباسارى - قارجى ءمينيسترى ءاليحان سمايىلوۆ مەملەكەتتىك جانە كۆازيمەملەكەتتىك سەكتور شىعىستارىن 128,6 ميلليارد تەڭگەگە قىسقارتاتىندىعىن ايتقان ەدى.