التىن، ۆولفرام، موليبدەن، اليۋميني قازاقستاننىڭ قاي وڭىرلەرىندە بولۋى مۇمكىن

None
None
نۇر-سۇلتان. قازاقپارات - قورعاسىن مەن مىرىشتىڭ جاڭا كەن ورىندارى قازاقستاننىڭ ورتالىق، وڭتۇستىك جانە دە كەندى التاي وڭىرلەرىندە اشىلۋى مۇمكىن.

بۇل تۋرالى بۇگىن ۇكىمەت وتىرىسىندا گەولوگيالىق بارلاۋدىڭ 2021-2025-جىلدارعا ارنالعان مەملەكەتتىك باعدارلاماسىنىڭ تۇجىرىمداماسىن تانىستىرعان ق ر ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ ايتتى، دەپ حابارلايدى قازاقپارات ءتىلشىسى.

«گەولوگيالىق سالانىڭ الدىندا تۇرعان وزەكتى پروبلەمالاردىڭ ءبىرى - قورلاردىڭ تولىقتىرۋ دەڭگەيىنىڭ تومەندىگى. گەولوگتار «ءبىر توننا وندىرسەڭ - بارلاۋ جاساپ، ورنىن ەكى توننامەن تولتىر» دەگەن قاعيدانى ۇستانادى. ءبىراق تا، بۇگىنگى كۇنى قورلاردىڭ ءوسىم دەڭگەي كوەففيتسيەنتى قاتتى پايدالى قازبالار بويىنشا - 0,13، ال كومىرسۋتەك شيكىزاتى بويىنشا - 0,9. سوندىقتان دا، جاڭا كەن ورىندارىن اشۋ جانە ونى ىسكە قوسۋ ءۇشىن، كەم دەگەندە 10-15 جىل ۋاقىت كەتەتىندىگىن ەسكەرە وتىرىپ، گەولوگيالىق بارلاۋ جۇمىستارىن قازىردەن باستاپ جانداندىرۋ قاجەت»، - دەدى ول.

ءمينيستردىڭ مالىمەتتەرىنشە، قوستاناي وبلىسىنىڭ، ورتالىق پەن شىعىس قازاقستان اراسىنداعى اۋماقتاردىڭ جانە قىرعىزستانعا ىرگەلەس ەلىمىزدىڭ وڭتۇستىگىنىڭ التىن كەن ورىندارىنا الەۋەتى زور.

«قورعاسىن مەن مىرىشتىڭ جاڭا كەن ورىندارى قازاقستاننىڭ ورتالىق، وڭتۇستىك جانە دە كەندى التاي وڭىرلەرىندە اشىلۋى مۇمكىن. سونىمەن قاتار، بۇل اۋدانداردا ۆولفرام، موليبدەن، اليۋميني، قالايى جانە سيرەك كەزدەسەتىن ەلەمەنتتەردىڭ كەن ورىندارىن اشۋعا مۇمكىندىك بار»، - دەدى ماعزۇم مىرزاعاليەۆ.

سونىمەن قاتار، بۇگىنگى كۇنى ەلىمىزدە گەولوگيالىق بارلاۋدى جۇرگىزۋگە ءىرى شەتەلدىك ينۆەستورلاردى تارتۋدا وڭ تاجىريبە قالىپتاسقانىن اتاپ ءوتتى.

«سوڭعى ءۇش جىلدا ولاردىڭ قاتىسۋىمەن 75 مىڭ شارشى شاقىرىم بولاتىن اۋماقتا گەولوگيالىق زەرتتەۋ جۇمىستارى جۇرگىزىلدى. قازگەولوگيا ۇلتتىق كومپانياسى قازاق مىسپەن بىرىگىپ، ءىرى دۇيسەمباي قورعاسىن-مىرىش، Ulmus قورىمەن بىرگە بەسشوقى كەن ورىندارىن اشتى. ريو تينتومەن بىرلەسە وتىرىپ، بالقاش قالاسى ماڭىندا پريبرەجنوە مىس كەن ورنىن اشىپ، قازىرگى ۋاقىتتا بارلاۋ-باعالاۋ جۇمىستارىن جالعاستىرۋدا. وسى جۇمىستارعا 17 ميلليارد تەڭگە كولەمىندە ينۆەستيتسيا تارتىلدى»، - دەدى مينيستر.


سوڭعى جاڭالىقتار