ماعزۇم مىرزاعاليەۆ تاياۋ جىلدارى تاۋسىلاتىن كەن ورىندارىن اتادى
بۇل تۋرالى بۇگىن ۇكىمەت وتىرىسىندا ق ر ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ ايتتى، دەپ حابارلايدى قازاقپارات ءتىلشىسى.
«ق ر پرەزيدەنتى قاسىم-جومارت توقايەۆتىڭ تاپسىرماسىنا سايكەس گەولوگيالىق بارلاۋدىڭ 2021-2025-جىلدارعا ارنالعان مەملەكەتتىك باعدارلاماسىنىڭ تۇجىرىمداماسى ازىرلەندى. بۇل ماسەلەگە مەملەكەت باسشىسى بىلتىر 5- قىركۇيەكتە اتىراۋ قالاسىندا وتكەن مۇناي-گاز سالاسىنا قاتىستى كەڭەستە باسا نازار اۋداردى. نەگىزى ەلىمىزدە 8 مىڭعا جۋىق كەن ورنى تىركەلگەن. ونىڭ ىشىندە 317 كومىرسۋتەك، ياعني مۇناي، گاز، كوندەنسات كەن ورىندارى بار. مۇنان بولەك، 910 قاتتى پايدالى قازبالار كەن ورنى بولسا، 3 مىڭنان استامى كەڭ تارالعان پايدالى قازبالارعا تيەسىلى. سونىمەن قاتار 4 مىڭعا جۋىعى جەراستى سۋلارى كەن ورنى بار»، - دەدى تۇجىرىمدامانى تانىستىرعان مينيستر.
ونىڭ ايتۋىنشا، بۇگىنگى كۇنى ءبىرقاتار وزەكتى ماسەلە كۇن تارتىبىندە تۇر. اتاپ ايتقاندا، مونوقالالارداعى تاۋ-كەن كاسىپورىندارىنىڭ شيكىزات بازاسىنىڭ تۇراقسىزدىعى، پايدالى قازبا قورلارىنىڭ ازايۋى جانە «بايىرعى» كەن ورىندارىندا ءوندىرۋ كولەمىنىڭ تومەن دەڭگەيگە ءتۇسۋى وزەكتى بولىپ وتىر.
مىسالى، قىزىلوردا وبلىسىندا جىل سايىن مۇناي ءوندىرۋدىڭ كولەمى 1 ميلليون تونناعا دەيىن تومەندەۋدە. وسى ماسەلە تاياۋ ارادا اقتوبە مەن ماڭعىستاۋ وبلىستارىندا دا بولجانۋدا. سوڭعى ون جىلدىقتا شىعىس قازاقستانداعى مونوقالالارعا جاقىن ورنالاسقان - شەمونايحا، يۋبيلەينو-سنەگيريحينسكوە، زىريانوۆسكوە ءىرى قورعاسىن- مىرىش كەن ورىندارىنىڭ قورى تۇگەلدەي تاۋسىلىپ، جابىلدى. 2025-2040-جىلدارعا تامان ورلوۆسكوە، مالەيەۆسكوە، تيشينسكوە، ريددەر-سوكولنوە سياقتى كەن ورىندارىندا دا پايدالى قازبا قورلارىنىڭ تولىقتاي سارقىلۋى كۇتىلۋدە»، - دەدى ماعزۇم مىرزاعاليەۆ.